Ka seiñ Jaiñtia Students’ Movement (JSM) Western Region hapoh i yahkhmat u President, u H. Supuh wa ki dkhot ka seiñ, ynne ka sngi da lai booddien ki neiyi i daw wa da pyndooh noh ya ka Exam Centre ka CUET ha Jowai. Yeini i wiar pyrtuid ka Jowai kam ka Cities of Exam Centre da chem lyngba ka Registration Form neibynta kani ka Exam kawa daw thoh ha uni u snem, wei hajrong ini da e dorkhat cha u Education Minister ka jylla, u Rakkam A Sangma lyngba u DC ka West Jaiñtia Hills District.
Kam wow pynkynmoo wa ka JSM nadooh ka 18-01-24 da dawa ko na ka sorkar wow e ya ka Exam Centre neibynta ka CUET(UG) wa kiwi kiwi ki Central Examination ha West Jaiñtia Hills District, deiwa phah ya ki chithi cha ka sorkar jylla, heiwa ka seiñ da yachem ko wa u Deputy Commissioner ka West Jaiñtia Hills District kamjooh ya kini ki chithi da phah cha ka NTA wa u Director of School Education and Literacy, Meghalaya hajrong i dawa ya kani ka Exam Centre ha Jowai.
Ka yurim wa ka JSM da dawa ko ya kani ka Exam Centre toh neidaw wa ha waroh kawi ka Jaiñtia Hills em chiboon ki khynnah kiwa thoh ya kani ka Exam CUET(UG) neibynta u yoh u lai puræ ya ka Bachelor’s Degree ha ki College sorkar kamjooh kiwa yasnoh waka NEHU.
Neidaw kiwa boon ki khynnah puræ kiwa na Jaiñtia Hills mih ki na ki chnong wa em cha palatsor, kamtæ lada kani ka Exam ym em Centre ko ha Jowai daw ktah ko chiboon ya ki khynnah puræ nadooh ka lai ka wan neidaw wa jngai ka luti, kamjooh leh boon ki khynnah puræ ki wym pu em u che næ chemphang bha ya ki thaw wa em ha Shillong.
Ka JSM da ong ko leh wym toh u e ya kani ka Exam Centre du ha u snem wa dadep donhi u snem 2024 neibhah hawa da yoh toh u neh ko, kamjooh ka Exam leh da yoh u thoh nadooh ka NEET, CUET(UG) ha u snem 2024 kammon won kwah ka sorkar u pyndooh biang ya ka, toh u nang pynskem chooh chooh khnang wa ka puræ puthi hapoh Jaiñtia u ku ko chaphrang, lada ka Centre Exam ym em ko ha Jowai pynman ko ya ki khynnah na Jaiñtia Hills u tlot ki.
Ka JSM da dawa ko na ka Education Department wow booh biang ya ka Exam Centre ha Jowai neibynta ka CUET(UG) kamjooh ya kiwi ki Central Examination man-u-snem ymtoh du kat chi snem kamjooh leh da ong wow e Exam Centre ya ki khynnah kiwa pyndap ya kani ka Exam deiwa paitbniah ya ki kot ki sla yong ki, deiwa bichaar ya ki chnong yong kiwa sah hapoh Jaiñtia Hills wa toh u yoh ki u thoh ya ka Exam ha Jowai, wot lada pyndap ki ya ka Exam Centre ha ka Registration Form ki ha Shillong leh.
Neiliang u DC ka West Jaiñtia da kular u wow chimkhia yeini u pynyoh biang ya kani ka Exam Centre ha Jowai, yow yoh ki khynnah napoh Jaiñtia Hills u thoh Exam ha Jowai.
Discussion about this post