Hadien wa mih i pyrtuid u Ayush Kumar kam uwi na kiwa chah jied wow lai puræ MBBS napoh ka Meghalaya State Quota ha uni snem, iwa da wanrah yei pyrchah na kiwa boon deilang wa ki seiñbhalang kiwa da lai ujor cha ka Montri sorkar wa pait ya ka chnat i chait i khiah, ka Dr. Ampareen Lyngdoh yow pyndam noh yei pyrtuid u neibhah da pynemkaam bakla ya ka PRC kawa da yoh deiwa thok wa chukor.
Ka seiñ JSU heiyatoh wa ini da lai booddien ko yei rukom yoh ya kani ka PRC heiwa da chem wa u Ayush Kumar da lai rah u da ka Temporary Residential Certificate wa da e da ka Dorbar Chnong Thangskai ha u snem 2021 dei wym em leh da pyntip cha ka dorbar chnong wa ya kani ka Temporary Certificate daw lai pynemkaam yow lai puræ.
Kamtæ deilang waka Dorbar Chnong da lai ujor leh cha u DC ka East Jaiñtia Hills yow pyndam noh ya kani ka PRC. Ka seiñ won najorong ka Montri sorkar da lai booh ujor ko leh cha ki sahep sorar kiwa pait yaka chnat Home wa Political deiwa ong wa u Ayush Kumar ym em hok u wow yoh ya ka State Quota neibhah wa man u u baar jylla.
Yow pynsakhiat yeini ka seiñ da pynoo ko leh ya ka Aadhaar Card u pa u Ayush kawa yoh u na ka jylla Bihar.
Heijooh i por leh ka seiñ da thoh ko cha ka chnat Election ha Khliehriat yow kylli lada u Ayush wa u pa yong oo em Vote ki ha ki Constituency ka District heiwa da jubab wa kini ym em pyrtuid ki hapoh ka Electoral Roll.
Ka seiñ da ong ko u pa u Ayush toh uwa kreh donhi ha Dalmia Cement wei ymtoh u tre chnong namo u tre jylla.
Hajrong ini waroh, ka sorkar da pyndam noh ko yei pyrtuid u Ayush kam uwi na kiwa chah jied wow lai puræ MBBS heiwa ka seiñ da pynsñiaw ko yei sñiawngooh khamtam ya ka chnong Thangskai wei da pdiang leh yeiwa da bakla ko deiwa kyntu leh ya kiwi ki chnong wym toh u e Certificate næ e NOC ya ki baar jylla neini chakhmat neibhah ye wow ktah wei chah yoohbeiñ i hok ki tre ri.
Discussion about this post