Ka National People’s Party (NPP) da tyngkheiñ ko ya ka Executive Committee wa yahkhmat da ka United Democratic Party (UDP) ha Khasi Hills Autonomous District Council (KHADC) ynne ka sngi.
Ya kani ka Executive Committee wa da yahkhmat da u MDC ka UDP na Sohra, u Titostarwell Chyne da pynhaap lyngba ka No Confidence Motion (NCM) wa da wanrah da u MDC ka NPP na Rambrai-Jyrngam, u Bajop Pyngrope pyrchah ya u CEM, ha ka sngi sdang yong ka Dorbar Lyiur ka Council ynne.
Ka No Confidence Motion da yoh ko yei kyrchaan yong ki 17 ngut ki MDC hapoh ka yung dorbar wa em 30 ngut ki MDC, iwa mut wa da biang wow pynhaap ya ka Executive Committee.
U Lamphang ka yung dorbar, u Lamphrang Blah da wanrah u ya kani ka No Confidence Motion deiwa phah thap Vote wei da pynbna syndon u wa ka EC hapoh i yahkhmat u Titostarwell Chyne da haap ko hadien wa 17 ngut ki MDC da kyrchaan ki ya ka No Confidence Motion.
Kini ki 17 ngut ki MDC wa kyrchaan kynthup ki ya 11 ngut ki MDC ka NPP wa 6 ngut ki MDC ka Congress
U Lamphang da pynbna u leh wa ya ka Election wow jied thymme ya u Chief Executive Member (CEM) daw pynman mynstep ka 20 tarik heipor 11:00 waje i step.
Da phah u leh ya ki dkhot wa kwah yakhun ya ka Election wow thap pyrtuid ki myntu ka sngi ha u Secretary ka chnat Legislative wei yei bichaar pyrtuid daw pynman mynstep ka sngi.
U MDC ka Sohryngkham, u Pyniaid Sing Syiem da lai u wow thap pyrtuid kam u kyrtong ka NPP wow yakhun ya kani ka Election jied CEM wa thymme yong ka Council.
Chwa ini, u Titos da kheiñ u ya kani ka No Confidence Motion kam i chet kylla yong ka NPP deiwa ong wa hapoh ka sorkar jylla ka Congress pyrchah ko ya ka NPP tangwa hapoh ka KHADC won bien ki wow ya krehlang.
