Ka World Tuberculosis Day kawa da pynman hajrong ka phang “Yes! We can end TB” da lehwarom ka ynne ha East Jaiñtia Hills District da ka District Tuberculosis Officer wei yaka yalang da pynman ha Khliehriat West Community Hall heiwa u Deputy Commissioner ka District, u A. Baranwal da man u kam u kongsan hei emlang ka District Tuberculosis Officer (DTO), Jaiñtia Hills, ka Dr. E.B.V. Laloo, u District Medical & Health Officer (DM&HO), East Jaiñtia Hills District, u Dr. D. Shylla wa kiwi kiwi.
Hawa e i klam, u Baranwal da e khublei u yaka chnat wa da pynman ko ya kam kani ka yalang ha ka District wow yarap pynsñiawthooh paidbah chaphang kani ka kjut Tuberculosis.
U Baranwal da kdaw u leh ya ki laad wa ye u tip wa em yei kjut TB wei wow lai sylli yei chait i khiah yong idæ dei langær wow pyndooh ya kani ka kjut wei da kyntu u wow pynsñiawthooh ya kiwi ha ka yung waka imlang sahlang heiyatoh wa kani ka kjut wei ymtoh wow kheiñstiñ ya ka.
Chooh chooh da kyntu u yaka imlang sahlang wow krehlang chirup wa ki bor sorkar wow pyndooh ya kani ka kjut.
Ka Dr. E.B.V. Laloo da ong ko wa ka phang yong kani ka sngi toh “Yes! We can end TB” wei emkaam i krehlang ka imlang sahlang wow pyndooh ya kani ka kjut. Da yaroh ko leh yeiwa chakri ki Nikshay Mitra ka District kiwa yarap ya kiwa kjut TB ha ka District deiwa saam ya ki baam wa kiwi de.
Ha kani ka sngi da pynkup burom leh yaka chnong Shyrwang wa Tlangmoi ki chnong hapoh ka Saipung C&RD Block wa man ki kam ki TB Free Village, da yoh leh i rwai na ki khynnah ka Little Star Secondary School, Khliehriat i lehke na ki ASHA hajrong ki dak ki chin yong ka kjut TB wei kammon wow smat u lai thooh dawai.
Discussion about this post