Ka yung krehkaam ka District Social Welfare Officer, West Jaintia Hills District da lehkmen ko ya ka sngi yong ki bru wa man kyrpang wa tip kam ka International Day of Person with Disabilities 2023 haka 4 tarik ha ka yalang wa pynman ha Syiem Jingsuk Secondary School, Lai Lyngdoh Hall, Amlarem Sub-Division, heiwa u H. Pohthmi, MDC War West uwa man leh kam u Deputy Chairman JHADC da man u kam u kongsan. Ka phang kani ka sngi toh kawa ong “United in Action to rescue and achieve the SDGs for, with and by persons with disabilities”.
Neiliang ka R. Passah, DSWO da ong ko wa kani ka sngi toh ka wow leh burom ha waroh kawi ka pyrthai neibynta ki bru kiwa em i duna hei doh i pran. Deiwa ong leh wa ka sorkar em ko ki Scheme wa kyrpang neibynta kini kiwa man kyrpang, kamtæ da kyntu ko ya ki bei ki pa wa lada em ki ya ki khon kiwa man kamni, ye ki wow lai cha ki Nodal Hospital khnang wow yoh ki yaka Disability Certificate yow ye ki wow lai cha ki yung krehkaam ka sorkar yow yoh yarap ki.
Ka Aidiam M. Kassar, Psychologist Manager, DRCDA da khana ko chaphang ka Scheme & Services for persons with Disabilities katwa u L. Khonglah, Advocate Jowai Bar Association da khana u chaphang ka Right of Persons with Disabilities.
U kongsan hawa e yei klam da kyntu u ya kiwa man kyrpang wow man kiwa chlur wei kiwa kreh chitom hanla em i duna hei bor i met i phaad. Da kyntu u leh ya ki manbei manpa kiwa em ki khon wa man kyrpang wym toh u sarom ya ki tangwa u wan ki chakhmat wow yalam cha ki yung krehkaam sorkar yow yoh yarap ki na ki Scheme sorkar waphær waphær.
Ha kani ka sngi da pynkup burom ya ki arngut kiwa man kyrpang kitæ toh u Kalvin Suting uwa na Moosakhia wa u Nicholas Khonglah uwa na Lai Lyngdoh.
Ha kani ka yalang da em leh ka Medical Checkup (General) wei da pynman leh yaka yalehke neibynta kini kiwa man kyrpang kam ka Musical Chair, Spoon Marbel Race wa kiwi kiwi heiwa da khsunaam leh cha kitu kiwa ya chimbynta.
Ya kani ka yalang da pynlai da u E. Kyndait, LDA yong ka yung krehkaam ka DSWO.
Discussion about this post