Kam chibynta yong ka World Blood Donor Day, ka Jowai Blood Bank Centre ynne da pynkup burom ko ya kiwa jooh e snaam sñiawbha ha ka yalang wa da man ha ka Conference Room kani ka thaw.
Da pynkup burom kyrpang ya u Specialson Turnia uwa da e snaam la 25 sien, u Socially Kamar wa u Wanmi Laloo kiwa da e 10 sien samen.
Ka District Level World Blood Donor Day da pynman da ka Jowai Civil Hospital Blood Centre hajrong ka phang “Give Blood, Give Plasma, Share Life, Share Often.”
Da yahkhmat wow chim ya ki kyntien kular da u Assistant Commissioner, u Wankhraw Kupar Kharbuli, hei emlang ka Medical Superintendent ka District Civil Hospital, Ialong, ka Dr. Rita Pohrmen, ka In-charge Jowai Civil Hospital Blood Centre, ka Dr. P. Shylla, kiwa kreh wa kiwi kiwi.
U W.K. Kharbuli hawa e yei klam da ong u wa kani ka sngi da kynmoo ya ka man-u-snem wow pynsñiawthooh paidbah hajrong i emkaam wow e snaam sñiawbha wei wow pynyoo yei burom yei sñiawngooh ya kiwa wan chakhmat wow e snaam yow yarap pynim ya kiwi ki bru. Da ban joor u leh wa ymtoh u em i mynsien wow yooluti ya iyi iyi ya idæ hawa e snaam sñiawbha. Da pynchlur u ya ki bru wa chait wa khlan i doh i pran wow wan ki chaphrang wow e snaam sñiawbha.
Da pynsñiaw u leh yei sñiawngooh ya waroh kitu kiwa da e snaam hadooh 25 sien wa 10 sien yei man tista ki ya ini i kaam wa emkaam bha yow yarap ya kiwi.
Ha kani ka sngi da pynman leh ya i e snaam sñiawbha ya iwa da pynman da ka Meghalaya Cricket Association & West Jaiñtia Hills District Cricket Association deiwa ya krehlang waka Blood Bank, Civil Hospital, Jowai heiwa da em 5 ngut kiwa da e snaam.
