U Dr. Tanie Natung, Professor & Head, Department of Ophthalmology ka NEIGRIHMS da yoh u ya ka khusnaam Sushruta Samman Award ha ka 5th National Assembly of Forum of Ophthalmology Professors of India (FOPI) & Pan India HOD Ophthalmology Group kawa pynman ha Raigarh, Chhattisgarh nadooh ka 2-3 tarik uni u bnai.
Ya kani ka khusnaam da e neibynta ki kaam wa da leh u kam u Professor wa HOD ka Ophthalmology yeiwa da e sikai u ya kiwa lai puræ Undergraduate (MBBS) wa Post Graduate (MD/MS) wei yei pliah u hei wow pooid pyllungkhmat ‘Excellence in Eye Surgery’.
Ka khusnaam Sushruta Samman toh ka khusnaam wa hakhlieh dooh na ki National Award wa e da ka FOPI ha ka Ophthalmology neibynta ki Professors kiwa da lehbha ha ki kaam sikai wa i pooid pyllungkhmat.
U Prof. (Dr.) T. Natung man u leh uwa da yoh ya ka ‘International Council of Ophthalmology’ Fellowship Award waka ‘Delhi Ophthalmological Society’ Travel Grant Award. Da man u leh uwa pliah bha ha ka Phaco-refractive Surgeries wa Strabismus & Pediatric Ophthalmology.
Ka NEIGRIHMS, Shillong da yoh nyngkong ko leh hapoh ka ri yei leh burom ya ka World Oral Health Day ha ka 20 tarik u Wisu heiwa palat 150 tylli ki Dental College wa kiwi ki thaw puræ na kylleiñ ka India da chimbynta ki. Ya kani ka yalang e khusnaam cha kiwa jop da pynman ha Nirman Bhawan, New Delhi ha ka 8 tarik uni u bnai heiwa da etki ya ki Certificate da u Dr. Sunil Kumar DGHS, Ministry of Health and Family Welfare.
Ya ka World Oral Health Day da lehkmen da ka Department of Dentistry NEIGRIHMS hapoh i yahkhmat u Prof. S Vijay Singh (Professor & HoD). Ka NEIGRIHMS da pynman ko leh ya ka Radio Talk Show, Awareness Run Campaign, Poster Competition wa kiwi de heiwa da lai leh cha ki skur yow lai pait yei chait i khiah i pohktien ki khynnah ha ki skur, ki thaw ri khonswet, ki yung wa pait ya kiwa da tymmen deiwa saam leh ya ki brut lamieñ wa dawai lamieñ, ki kot lakdop kiwa khana chaphang i chait i khiah.
Yeiwa ye u e yei sumaar deiwa toh dor, ka NEIGRIHMS da yoh ko leh ya ka khusnaam ‘Ayushman Utkristata Puraskar 2021’ neibynta ka Best Performing Hospital in Small State Category. Ya kani ka khusnaam da e cha ka NEIGRIHMS ha ka 8 tarik uni u bnai.
Ka NEIGRIHMS da pynkrehkaam ko deiwa jop ya ka Ayushman Bharat-PMJAY deiwa krehlang waka MHIS (Meghalaya Health Insurance Scheme) neibynta kiwa chitom wa wan na ki manyung wa dooh. Ya kani ka khusnaam da e cha ka NEIGRIHMS yeiwa boon dooh kiwa wan kam yow yoh yei su da ka Insurance na ki Hospital wa em ha ki jylla wa khian. Najrong kini da pynkrehkaam leh ya kiwi ki Scheme kam ka CMAAY (Chief Minister Arunachal Aarogya Yojna) waka RAN (Rastriya Aarogya Nidhi).
