Ynne ka sngi chwa wa ka Dorbar Lyiur wa chisngi ka JHADC u lai ko chakhmat hapoh i pynlai u Dy. Chairman, u Wailad Dameshwa Siangshai, neiliang ki MDC ka Liang Pyrchah wa kynthup ya u Awhai Andrew Shullai, u Jamshaphrang Pohtam wa u Daemi Liam dei sñiaw chrai da paan pynche ki na u Dy. Chairman wa neiyi i daw da kyntait ya ki yukylli (Questions) kamjooh ka Motion yong ki u wanrah hapoh ka dorbar.
U Jamshaphrang ong u katkam i tip u, ki yukylli wa wanrah u toh kiwa haap hapoh u pood u ang ka Council, wei ym em leh i ya tyngkhooh waka aiñ, næ kiwa dang em hapoh ki mukotduma ha ki yung bichaar.
U Daemi Liam won hajrong i chah kyntait ka yukylli u iwa yatoh wa u pood, ong u wa haka dorbar wa dadep, hawa kylli ya kam kini ki jooh pdiang hi tangwa ileh won ha kani ka kynti da chah kyntait.
Neiliang u Andrew Shullai won kam uwa chah pyndooh u wanrah ya ka Motion da ong u hawa pyndooh toh u em ki daw wa che lym kamtæ ymtoh u lai chakhmat ya ka dorbar.
Hadien wa neiliang u Dy. Chairman jubab u wa ye u man wa em ki daw hapoh ki chnat krehkaam wei ya ki daw daw yaleh u wow thooh, kamtæ da lai chakhmat ya ka dorbar.
Hadien wa ka dorbar da lai ko chakhmat deiwa e laad du mar le tylli donhi ki yukylli, da poi sa i sñiawlem ya ki MDC wa da khlaad, i wanrah ya ka Official Report ka CAG wa ka Motion wa wanrah u Jamshaphrang wei hadien ini neiliang u Chairman da pynkut noh u ya ka dorbar, katwa ki MDC ka liang pyrchah won ym em pdiang ki neidaw wym pu em dep lut ya waroh ki yukylli.
Kamtæ mar ya mih napoh yung dorbar da lai yachem ki ha kamra krehkaam u Dy. Chairman wow pynsñiaw yei wym hun ki yei smat pynkut dorbar khlem da e laad de u wanrah ya ki yukylli wa dang sah, neibhah ki dang yooluti ki lada kut myntu leh jan daw pteiñ biang mynstep.
Kiwi won leh ki MDC wa chah kyntait wow kylli kam ka Deiwi Tongper, u Gresentus Susngi wa kiwi da pynsñiaw ki i chrai hajrong i wym yohlaad u wanrah ya ki mat yukylli iwa toh neibynta i bha i miat ki paidbah wa ka imlang sahlang.
Discussion about this post