Ha ka khubor wa da phah lyngba u Chief Organizing Secretary yong ka FKJGP Jaiñtia Hills Zone u D.S. War, wa nei joor ware u slap ha kini ki 2 sngi kitæ nadooh ynnin hadooh wa ynne ka sngi, da em i jia wa sñiawsih ya i manyung yong ka Lang Pyrtuh kawa naka chnong Namdong-B.
Ha ini i jia, u slap wa i chlai um da pynjæd pynpra wei da rah lut ko ya u kba uwa da dep choh da dep pynlang hapoh trep kamjooh da pynsih ya u kba u wym pu em dep ah uwa dang em hapoh hali ha i thaw rep yong wa tip kam i Thadlamet Namdong.
Ha i yachem uwa yahkhmat ka seiñ wa ki tre kiwa da maad ya ini i eh da khana ki ya i dooh nong yong ki ha kani ka sngi iwa da kynjoh ko cha 9-10 churia heh u kba wei da dooh leh ya ki kchu ki pliang ki marbaam mar dih kiwa em hapoh trep kba.
Neiliang yong u D.S. War da pyntip u leh cha ki wakreh yong ka C&RD Block Thadlaskeiñ wei kamjooh cha ka yung krehkaam ka rep ka riang ya ini i jia wa neiliang yong ki da kular ki u chimkhia ya ini i jia, neibhah uni u kba ki warep toh uwa pyndap baam yaki waroh chi snem.
Kamtæ neiliang u D.S.War leh da kyntu joor u yaki bor kiwa hajrong wow e yarap cha kani ka manyung kawa da maad yeini i eh.
