Chah rahbor ar ngut ki kynthai

Jowai: Arngut ki kynthai wa sah ha mar jan yung ha Jowai ynnin kamwa 6:30 janmiet da lait ki u yut napoh kawi ka kari wa mut u rahbor ïa ki cha Treriat.

Katkam ka FIR wa booh ynne ka sngi ha Jowai Police station da pyntip ki wa ynnin ka sngi kawi ka kong wa da em khon la ar ngut da wan ko da kawi ka kari tourist Maruti 800 rong bnieñ yow libooh kynnah wakreh cha iwi i yung ha Mooralong na Wahiajer. Chwa u libooh ïa kani ka khynnah wa kreh da lithooh chwa ko sa kawi ka kynthai kawa em kamwa 23 snem i rta na Mihmyntdu yow yoh lok ko u libooh ïa kani ka khynnah wa kreh da kajooh hi ka kari wa wan ko.

Hadien wa dep libooh ïa kani ka khynnah wa kreh da ong ki ya ki ïa u wa yah kari u libooh u ïa ki cha yung wa sah ki ha Jowai. Uni uwa yah kari deilang wa u lok yong oo da lai ki naka surok wow lai cha Norman Tunnel Hospital. Manda poi ki nadien ka Thomas Jones College da sangeh ki wei da pynbor ïa kani ka kynthai wa 23 snem u chong ko ha khmat deilang wa u nongyah kari. Hadien wa ym bien kani ka kynthai da thmu ki u kit ïa ki cha tre riat. Manda pyrchang kani ka kynthai u phone da sdang ki u pynheh da i sur hapoh kari yow lait ko u sñiawthooh u yaklam wow khana yeini na phone yeini wa jia.

Kani ka kynthai da yoh laad ko u phah ko da i message cha uwi u lok yong ka uwa wan kdong da ka kari nadien.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Manda poi ki ha Lekyrnah ha i thaw wa lai suki ka kari, ka manbei da maham ko u kynthiar na kani ka kari deiwa wai ia ka dwar kari. Katwa ka kynthai wa 22 snem won ym em de yang ko u sangeh ka kari da kynthiar ko napoh ka kari. Hadien wa jia ini u wa yah da sangeh u ïa ka kari wei ka manbei leh da yoh ko u hiar na ka kari. Ki bru wa sah cha jan da mih u yarap ïa kini ki arngut katwa ka kari da yut ko neini i thaw.

Da wan kit ïa kini ki arngut cha yung da u lok kani ka kynthai wa 23 snem. Katkam i sñaiwthooh, kani ka manbei da tipmit ko ïa kini ki arngut ki chynrang.

Ynne ka sngi ki pulit da phah wan ki ïa kini ki chynrang cha thanat Jowai Police Station. Hadooh wa pynmih ïa kani ka khubor kini ki arngut ki chynrang ong ki wa em cha thaiñ Sutnga cha jan ka Jaintia Cement Factory wei ym pu em wan ki cha thanat.