U Chief Minister warim ka Bihar, u Lalu Prasad Yadav da chah rai pynrem u ha ka yung bichaar wa kyrpang ka CBI ha Jharkhand ya ki kaam pyrchah aiñ u heiwa da sai tooh u ya ka poi T. 139.35 klur na ka Doranda Treasury.
U Lalu Prasad kattu da chah rai pynrem u ha waroh ki 5 tylli ki kaam baam-tooh iwa da tip kam ka Fodder Scam heiwa ya oo da chah pynbaad kam uwa sooh buit wow leh yeini, wei ynne i step da emlang u hapoh ka yung bichaar heipor wa u Judge CK Shashi da puræ u yeiwa rai ka yung bichaar.
Da em leh 98 ngut kiwi hapoh ka yung bichaar kiwa chah bichaar heiwa 24 ngut na ki da lait ki nei chah pynrem.
Na kiwa sah da em 35 ngut kiwa da phah kset patok ya ki 3 snem wa kynthup ya u MP warim u Jagdish Sharma, u Public Accounts Committee (PAC) Chairman u Dhruv Bhagat wei ini mut wa kini ye ki wow yaleh jamin.
Ka hukum wa hadooh katwon snem u phah kset ya u Lalu Yadav wa 39 ngut kiwi kiwa da chah rai pynrem daw pynmih ha ka 21 tarik uni u bnai.
Neiliang u muktiar u Prasad da pyntip u wa da paan bor wow rah noh ya oo (u Lalu Yadav) cha RIMS (Rajendra Institute of Medical Sciences ha Ranchi) neidaw wym em chait bha u. Wei yeini daw chong bichaar ka yung bichaar.
U Lalu Yadav chwa ini da dep u wow chah rai pynrem ha ki 4 tylli kiwi ki kaam pyrchah aiñ wa yatoh wa kani hi ka Fodder Scam kawa poi hadooh T. 950 klur heiwa da sai tooh ya ka poisa T. 37.7 klur wa T. 33.13 klur na Chaibasa Treasury, T. 89.27 klur na Deoghar Treasury wa T. 3.76 klur na Dumka Treasury.
Heiyatoh wa i chah rai pynrem haka mukotduma ka Dumka, da deiñ kuna ya oo leh T. 60 lak.
Ha waroh ki 4 tylli ki chah rai pynrem chwa, u Lalu Prasad da yakhun pyrchah u ki wei ha kani ka kynti leh ye u wow yakhun pyrchah biang.
Waroh kini ki kaam toh yei baam-tooh ya ka poisa sorkar wa da booh neibynta wow pynbiang baam wa kiwi de ya ki masi heiwa da sai ya ka khlem da pynemkaam ya iwa da toh u leh wei da thap bait cha kata iwa da pteiñ kamwa 20 snem chwa wow mih pyrthai i wei waroh kiwa da dep chah rai pynrem wa emkti ha ini i kaam da em ki palat 500 ngut.
