Ka Principal wa uwi uwa sikai skur sorkar (Higher Secondary) ha Srinagar da chah siat ki hadooh wa yap ha i bynta wa tip kam i Eidgah ynne i step, iwa da pynpoi ya ki bru paidbah wa da dooh yei mynsien cha 5 ngut nadooh ka 5 tarik uni u bnai
Ki pulit da pyntip ki wa ka Satinder Kour kamwa man kam ka Principal wa uwi uwa sikai wa tip kam u Deepak Chand da yap ki pyn hei thaw wa chah siat ki hapoh ka skur. U Chand toh uwa na Jammu wei waroh ar deilang wa ka Kour toh kiwa sah ha Aolochi Bagh ka Srinagar.
Kini ki arngut da chah tynyap ki du hadien ar sngi wa u Makhan Lal Bindroo (68 snem) uwa man kam u Chemist, uwi wa tyrwa mar cha rood saork u Virender Paswan uwa na Bhagalpur, Bihar wa u Muhammad Shafi Lone, uwa kamai Taxi da chah siat yap ki ha ki le tylli ki thaw ha Kashmir ha ka 5 tarik. Nadooh ka tayaw wa da dep, la 7 ngut ki bru paidbah kiwa da chah siat du ha Srinagar.
Ki pulit ym pu bien ki wow khana chiboon hajrong ini i jia wei wow ong leh kiyi wa bahkhlieh ya ini, heiwa da mih i beiñ na kiwa boon heiyatoh wa ini wa jia.
U Chief Minister warim, u Omar Abdullah da beiñ u ya ini i jia wow tynyap ya kiwa sikai skur deiwa ong wa em de ki kyntien wow beiñ ya kam ini i kaam.
Da em leh ka chithi wa da pynpoor ha ka Internet kawa da kam toh ya ini da leh da ka Shaheed Gazi Squad ka The Resistance Front kawa da ong wa kini ki arngut kiwa sikai da phah pynbor ki ya ki khynnah wow lai skur ki cha i thaw wa da chim da ka India.
