Hadien wa chah siat yap uwi u heh pulit ka Manipur ynnin ka sngi uwa tip kam u Chingtham Anand Kumar (50 snem) uwa man kam u Sub-Divisional Police Officer (SDPO) ka Moreh heipor wa dang lai pait u yei chna yei thaw hiar ka Helicopter ha Eastern Shine School, Moreh heipor 9:45 i step, neiliang ka sorkar da phah ko da ki Manipur Police Commando wow lai ki cha kani ka chnong wa em ha khappood waka Mynanmar.
Ka chnong Moreh toh kawa em kamwa 115 Km na ka nongbah Imphal wei i chah siat uni u heh pulit toh ha u Sniper wei ha kani ka jooh ka sngi da em sa ar sien i chah siat ki pulit.
Uni u heh pulit da chah siat u na ryngkhi wei u kuli da pai liang u na kpoh u heiwa da khlaad noh u heipor 10:15 i step ka jooh ka sngi wei da kit ya oo da ka Helicopter cha Imphal deiwa lai booh ha JNIMS yow leh ki yeiwa emkaam.
Kiwi ki pulit wa chah siat kynthup lang ki wa ki chipai ka Assam Rifles iwa da jia ar sien heipor wa lai luti ki ha u sarok Imphal-Moreh heiwa da mynsoo 3 ngut wei deilang wa ki Police Commando da poi ki heipor pyrdi synyaaw ha Moreh yow thooh ya kini kiwa siat.
Kiwa emkti ha ini da suba toh ki Kuki heiwa ki seiñ ki jaitbru Kuki da ong ki wa ini toh da jia i neidaw wa da joor pynemkaam ya ki Police Commando katwa ka ‘Joint Action Committee Against Cold-Blooded Killing of Ch Anand, SDPO, Moreh by Chin Kuki Narco Terrorist’ da dawa ki na ka sorkar wow pynchitom ya ki seiñ ki Kuki kamjooh kiwa lai puræ kiwa kyrchaan ya kini ki ‘Chin-Kuki Narco Terrorist’ kiwa da yaleh tham pyrchah ya ka ri.
Neiliang ka sorkar Manipur da ujor FIR ko pyrchah ya ka seiñ wa tip kam ka World Kuki-Zo Intellectual Council (WKZIC) kawa da pynbna ha ka 24-10-23 deiwa khut ya ki jaitbru Kuki-Zo wow rah suloi ki.
Ynne i step won da kem ya 44 ngut ki Kuki na Moreh heiwa na kini 32 ngut toh kiwa na ri Myanmar.
Ha iwi won i liang, ka sorkar Manipur da rai ko wow pteiñ yei khang Internet hadooh ka 5 tarik uni u bnai.
Discussion about this post