Ki warep ka chnong Moochrot, West Jaiñtia Hills haka 16 tarik uni u bnai da yoh ki yei e sikai kammon wow yoh yaka Organic Certification (NPOP) yow tipmit ya ki mar rep yong ki kam ki wym em pynemkaam da ki sboh dawai wa chna da u bru namo kiwa pynmih da ki karkhana.
Yow leh yeini da wan wow pynche bniah da u Y. Shylla, Technical Assistant ka yung krehkaam ka chnat Horticulture, Jowai haka yalang wa pynman da ka Farm Connect Development Society.
Neiliang u Franky Joshua Lyngdoh uwa man u President ka Society da pdiang sñiawbha u ya kiwa wan waroh wei da yoh yei klam na u Rupaia Siangshai uwa man u Horticulture Development Officer yong ka Laskeiñ Block hajrong ka Organic Farming lane ka rukom rep deiwa khlem pynemkaam da ki sboh dawai kharkhana tangwa deiwa pynemkaam da ki sboh kiwa da em cha soodong ki kpær kiwa ye u chna pynda-i-hi kiwa man leh kiwa suk u chna wei duna i lut.
Da sikai leh heijooh i por kammon u chna ya ki sboh Organic Jeevamrit wa ka dawai Beejamrit deiwa pynemkaam da i ait masi, jung masi, mynkruid, chuni wa u Beson Powder.
Da khana leh yei maa ya i khyndaw lada pynemkaam bait da ki sboh dawai wa pynmih ki kharkhana, neibhah wa emkaam wow sumaar yei khyndaw yow lait i u yap yow yoh ki pateiñ wa daw wan.
Da sikai leh kammon u jied ya ki symbe wei kammon u khleh dawai ya ki symbe khnang wow yada nei kjut wa ki khñiang. Da sikai leh kammon u pynman yei khyndaw wa sboh wei kammon u sumaar ya ki mar rep yow lait ki na ki khñiang, na ki kjut wa i mih ki phlang (Weed) da ka rukom Organic.
Da kyntu wei pynchlur u ya ki warep wow pynemkaam da ki sboh lane ki dawai Organic khnang wow wanrah yei chait i khiah i khyndaw, yow chait u khiah u jhoor yong ki deilang ya ki mrad wa kamjooh leh ya u bru wei waroh ka soodong sookun yong ki.
Heiyatoh wow yoh ya ka Organic Certificate, nyngkong toh u Register yei kreh namo ka Project waka APEDA (Agricultural & Processed Food Products Export Development Authourity) kawa e ya ka Organic Certificate. Ya ka Application Form toh u pynpoi cha ka APEDA kawa daw pait wei sylli ya ki kot ki sla wei daw lai pynsakhiat yei rukom rep da ki Field inspector ar sien ha i por wa em i mar rep ha ki thaw rep yow pyntikna ki wym em pynemkaam dawai wei ym toh u pynkhleh ya ki mar wa rep dei dawai wa kiwa rep khlem dawai katkam ki kyndon ka NPOP.
Daw chim nongmuna leh yow Test yow pynsakhiat wa ym em pynemkaam dawai chwa wow yoh ya ka Certificate.
