Jowai: Kiwa pynmih mar wa kynthup nadooh kiwa pynmih mar baam, kiwa thaiñ, wa chna, ki warep wa kiwi da chah sikai ki ynne ka sngi heiyatoh wa kammon u pynlai yaw yaki mar yong ki lyngba ka yaw dai Online kawa tip kam ka omechan.com.
Ya kani ka Workshop namo ka e sikai da pynman leh da ka omechan.com hi neibynta kiwa pynmih mar ka Ri-loom Jaiñtia ha yung krehkaam u General Manager District Commerce & Industries Centre West Jaiñtia Hills District Jowai.
“I pyrkhat wow sdang ya kani ka yaw Online toh yow yarap ya kiwa pynmih mar u pynlai yaw ki yaki tiar ki mar baam lyngba ka omeshan.com heitæ i rukom wow ya imlang, neibhah hadien wa wan ka khlam COVID-19 boon kiwa pynmih mar da chah ktah i khih i khan ki,” ong u R.Nongrum uwa pynlai yaka omechan.com.
Da ong haroh u wa ka Ri-loom Jaiñtia toh kawa pynmih boon ki jait mar ki jait tiar, kamtæ hadien wa da yoh ki yei mynjur na kiwa pynmih mar kiwa da dep pynpliah næ chah sikai lyngba ka yung krehkaam u General Manager District Commerce & Industries Centre, da pynkhreh ki ya kani ka Website wei da man ko kawa biang u krehkaam kattu wei sah sa du u booh yaki tiar ki mar wei sdang yaka ya dai ya thied.
U District Manager Commerce and Industry Centre u P. Toi da kyntu u yaki paidbah wow chim kabu ya kani ka rynsan, tangwa toh u yakhun ki yei miat (Quality) ki tiar ki mar baam wa pynmih ki yow lait nei chah khñium wei yow man ki kiwa lai yaw.
Neiliang u H.H. Mohrmen, President ka SURE da e yumut u wow pynphær yei rukom pyrkhat khnang heiyatoh wa i heh (Size) yow ye u pynlai yaw cha baar tangwa wym toh won u ktah yaka Quality.
Hei yaklam wa ki kattu katni kiwa pynmih mar wa da wan chimbynta ha kani ka Workshop, da pynsñiaw ki yei kmen ya kani ka rynsan Online, neibhah nadooh wa em kani ka khlam wym yohlaad de ki u pynlai yaw yaki mar yong ki, ym toh kam nachwa wa jooh yoh ki u pynlai yaw lyngba ki Exhibition wei deiwa lai cha baar.
