Ka FIFA da chim ko yei rai wow Suspend ya ka All India Football Federation (AIFF) chisyndon neidaw wa em kiwa pynthut da kiwa na baar ka AIFF yei rukom krehkaam ko iwa man leh pyrchah ya ki kyndon wa da booh ka FIFA wow krehkaam.
Tangwa ka FIFA da ong ko wa daw pyndam ya ini i chah Suspend lada pynmih ya ka hukum yow pyndam yei thung ya ka Committee of Administrator kiwa chimkti yei bor ka AIFF Executive Committee wei manda yoh biang ka AIFF yei bor wow pynlai yei kaam yong ka hi.
Da ini mut wa ka FIFA U-17 Women’s World Cup 2022 kawa toh u pynman ha India nadooh ka 11 hadooh ka 30 tarik u Naichiphaw 2022 ym ye de u pynman ka kamwa da pynbait.
Ka FIFA da pyntip ko leh wa da yaklam ko waka Ministry of Youth Affairs & Sports ka India wei da yooluti wa ini daw ye u pynbait smat.
Ini mut wa lada ya ka U-17 Women’s World Cup da pynman cha kawi won ka ri, ka India ye ko wow dooh u chimbynta neibhah ka India da yow ko wow chimbynta kam ka ri wa pynman ya ka lympung ym toh deiwa yaleh ko yow jop yow yoh u psiah cha kani ka World Cup.
Ini da mut i leh wa kiwa yalehbol wa mihkhmat ya ka ri India daw chang khang ki wow chimbynta ha ki Tournament wa pynman cha kiwi ki ri heiwa ka India da toh u yachem ko ya ka Singapore waka Vietnam ha u bnai wow wan kam wow pynkhreh ya ka Asian Cup ha u snem wow man.
Ini waroh da sdang i hadien wa ka AIFF ym ye ko wow pynman Election yow jied ya u President wa thymme heipor wa da booh neidaw wa pynslem i pynbait khaddooh ya ka Constitution iwa da poi chadooh ka Supreme Court kawa ha uni u Naisan da thung ko da ka Committee of Administrator kiwa em 3 ngut wa kynthup ya u Ex-Chief Election Commissioner, u S Y Quraishi, u Supreme Court Judge wa da chong ngiah, u Anil Dave wa u India Football Captain warim, u Bhaskar Ganguly yow pynlai ya ka AIFF deiwa pyndam noh ya u Praful Patel kam u President ka AIFF. Ka FIFA da chim ko yeini kam i pynthut da kiwa na baar yei krehkaam ka AIFF wei da man leh pyrchah ya ki kyndon ka FIFA heiwa ynnin da chim ya ka rai wow Suspend ya ka AIFF.
Kani ka mukotduma toh kawa da em ha ka Supreme Court nadooh u 2017 heiwa u Praful Patel ym bien u wow pynman Election deiwa e daw wa dang bichaar da ka Supreme Court heiwa i man u kam u President le sien da kut ko ha u Kmaichonglad (Dec), 2020 tangwa da ksoh bait u ya ka chuki kat wym pu pyndep ya ka mukotduma.
Kani ka mukotduma toh neibynta ka Constitution thymme ka AIFF tangwa da em ka Sports Code wa ong wa ki National Sports Federation ye ki wow ksoh hadooh 12 snem donhi ya ka chuki ym toh u palat.
