Kattu katni ngut ki warep saroo na ka chnong Lumputhoi, Elaka Rymbai, East Jaiñtia Hills da chah ktah ki neidaw wa em kiwa thang dusmon ya ki saroo yong ki ha ki thaw pynlang, thaw thaad rkhiang ha bri yong ki hadien wa dep khait ki na thaw rep.
Da kheiñ antaad wa kini ki saroo wada baam lut i diñ da poi ki kamwa 1200 Kg chirup wa ki tiar ki tar wa em hapoh yung bri yong ki.
Ini da jia i haka 6 tarik uni u bnai heipor 1:00 waje i sngi wei da jia leh heipor wym em bru heiwa ki warep dang em ki cha ki thaw rep wow khait ya ki saroo wa dang sah.
Ki warep saroo wada chah ktah ha ini toh u Henry Lyngdoh, u Prim Lyngdoh, u Bar Lyngdoh, ka Moit Lyngdoh, ka Rila Lyngdoh wa ka Kordor Lyngdoh.
Kini ki warep saroo da pynsñiaw ki yei sñiawsih neibhah wa da ki bnai ki bnai da pynlut sngi ki u ri u sumaar ya u maar rep yong ki. Tangwa dei wym poi pyrkhat da dooh nong ki syndet na ini wa jia.
Kini ki warep kiwa chah ktah da booh ki yei kyrpaad ya ki chnat sorkar, kiwa mihkhmat wow sñiawbha ki u kyruiñ khmat kamjooh wow yarap ya ki warep khnang yow yoh mynsien chooh chooh ki u pynheh yei rep yong ki.
U Waheh Chnong deilang wa u Secretary Chnong Lumputhoi da booh ki leh yei kyrpaad ya ki bor sorkar wow sñiawbha ki u yarap ya kitai ki warep wada chah ktah kiwa da dooh nong wei da lutsan.
I lut i sep da poi ko kam wa T. 1,32,000, i dor u saroo chi kilo da poi T.110 hei boon wa 1200 Kg.
Da chah baam leh hei diñ ki kseh lung wada khai da plung ha kani ka thaw wa man ka thaw rep kseh hadien i rep kba-loom. Ki kseh khian da ki hajar tre da iñ lut ki ha i diñ.
I dooh nong waroh na ki tre dieñkseh da poi cha ka T. 2 lak tam.
Ka kyrwoh khubor na u General Secretary Chnong Lumputhoi, u S. Lyngdoh.
