U President ka Jaiñtia Hills Autonomous District Council Staff Association, u Johnson Pohrmen da pynsñiaw u yei sñiawsih hajrong i chah thok yong ki ha u Montri Rangbah ka sorkar jylla, u Conrad Sangma, neibhah wa hei lai yachem u MLA ka Jowai deilang ki MDC ka JHADC haka 8 tarik uni u bnai wow pynsñiaw yei eh ka Council khamtam i dooh tulop kiwa kreh, neiliang u Conrad Sangma da kular u wow pynlait ya ka poisa kamwa T. 30 klur haka 11-07-2022 khnang yow yoh su tulop ya kiwa kreh ka JHADC ha chwa ka Behdieñkhlam tangwa ini i kular wym em man kam i.
I wym ksoh kular u Montri Rangbah da pynsñiawsih joor ko ya ki kam kiwa kreh ka Council, wot hawa i dawa yong ki toh ka hok yong ki hi wa ka Council toh u yoh ko yaka bhah poisa naka sorkar jylla.
Heijooh i por ong u, ini pynyoo wym em burom ki ya kiwa mihkhmat ka Ri-loom Jaiñtia kiwa da lai yachem wa oo markhmat kamjooh leh i yoobeiñ ya kiwa kreh ka Council kiwa da maad chi maad yei dooh tulop.
Khana haroh u yei eh neidaw i dooh tulop wa neipor cheipor khamtam ha kani ka sorkar wa katni da pynbor ko ya ki wow hap lai pynsñiaw cha ka yungbichaar Meghalaya High Court ha u snem 2020, wei lyngba i yarap ka High Court, ka sorkar da pynlait ko yaka bhah yong ka Council wei da yoh ki yaka tulop hadooh u July 2021, ka tulop wa sah katni won toh nadooh u August 2021 hadooh ynne ka sngi.
Booh yukylli u deiwa ong, weileh hap lai bait chaka aiñ yow yoh yaka bhah wot hawa toh ka hok yong i hi leh.
I dooh tulop da wanrah ko chiboon i jynjar ya kiwa kreh ka Council hadooh wa hap sah ram ha kylleiñ, neitæ ktah ko yei puræ puthi ki khon ki kti yong ki najrong kiwi won i eh i khoo.
Kamtæ kyntu u ya ka sorkar kamjooh kiwa mihkhmat ka Ri-loom Jaiñtia wow sñiawbha ki u chimkhia yaklam yeini i eh ka Council kawa man leh i eh u paidbah ka Ri-loom Jaiñtia, najrong wa ban joor haroh u ya u Conrad Sangma wymtoh u yoobeiñ u ya ki MDC ka JHADC neibhah ka por em ko jar jiar i kylla.
Pyntip haroh u wa ynnin i janmiet yoh yutip u wa ka poisa da poi ko cha ka Council kamwa T. 35 klur, hajrong ini ong u chibynta kmen hi u tangwa da palat i por neibhah da kular wow pynyoh chwa ka Behdieñkhlam, tangwa ka lehkmen Behdeiñkhlam su kut hi ko, khlem yoh kiwa kreh ka Council kiwa dang toh Niamtre u pynemkaam ya ka poisa wa da kular cha ki.
Puræ leh: T. 30 klur u yoh ka JHADC yow su tulop chwa ka Behdieñkhlam
