Uwi u khynroo wa 22 snem i rta uwa chong wa sah ha chnong Shangpung da pyntip u wa da chah thok u T. 40,000 yow yoh kreh chipai hapoh ka Assam Rifles ha u snem 2019 heiwa deilang wa oo leh da em kiwi kiwa da chah thok lang.
Uni u khynroo uwa ym em kwah wow pynmih pyrtuid neidaw wa da chah maham u ha kiwa thok ya oo, da ong u wa hadien wa lai cha ka Rally thap kreh chipai ka Indian Army ha u snem 2019 heiwa ym em yoh yei kreh, manda poi cha chnong, da em uwi u para chnong, para kur uwa da yachem wa oo uwa da kam wa da dep u wow pynyoh kreh la 4 ngut ki bru hapoh Assam Rifles tangwa emkaam wow su T. 40,000.
Kamtæ yow pynsakhiat ya ini, da wan leh u bru ha Shangpung uwa kam toh uwa kreh ha Assam Rifles uwa pyrtuid u Pawan Kumar Sharma uwa ym em rah tang ka ID deiwa ong wa mih jhan u na Shillong kamtæ da mylliñ u wow rah ya ka ID heiwa ha kani ka sngi da emlang leh kamwa 5 ngut kiwi kiwa thooh kreh kiwa da e mar T. 40,000 samen cha uni u bru yow yoh kreh ha ka Assam Rifles.
Hadien ini hawa booddien ya ini, uwa pyntipmit ya kiwa chah thok wa u Sharma da phah u da i dur ya ka chithi wa da pyndam ya ka Training tangwa hadien ini da yoh ya ka chithi wow wan psiah kreh haka 02-09-19 ha Assam Reginment Center Happy Valley, Shillong heiwa ha kani ka chithi ym em leh ka Letter Head wei da soi da u Lt. Col Dinesh Kumar Rai.
Kamtæ kiwi kiwa da yoh lang ya kani ka chithi da lai lang ki cha Shillong kiwa da em kamwa 10 ngut wei manda hiar kari ki ha Anjalee, Shillong manda phone ki ya u number u Sharma toh iwa ym krehkaam kamtæ da liwan noh ki.
Neiliang uwa chah thok da pyntip u wa da dep ya khutlang u ya kiwi kiwa chah thok lang yow lai ujor cha ki pulit tangwa ym em wa nood neidaw wa chah maham ki wei dei yong samen leh ym nood u wow lai chakhmat.
Da ong u leh wa ha itu i por toh wa da joor wa kwah kreh kamtæ da leh u yeiwa leh u kamjooh deiwa chaniah ya uwa para chnong uwa man chi kur chi jait uwa da maham leh ya oo lada lai ujor u cha ka aiñ hajrong ini.
Kamtæ da kwah u wow pynmih da kani ka Wyrta yow kyntu u ya kiwi wym toh u chah pynbiej kamni heiwa oo da dooh u ya ka poisa wa da khih chitom u.
Chooh chooh leh da pyntip u wa heipor wa pyrchang ki wow yaleh kreh ha Assam Rifles ym toh deiwa em wa pynmih Advertisement wei toh du wa chniah donhi ya u para chnong para kur.
