Shillong: Uwi u khynroo uwa dang dep puræ na ka All India Institute of Aeronautics, Dehradun, ha u Duiatra (Jan) 2014 da ujor u wa ki pulit wa da chah thok u T. 18 Lak.
Uwa chah thok wa tip pyrtuid kam u Pynshaitbor Bareh da pyntip u wa uwa sikai ya oo u Captain Saurav Shahi da kam u wa kreh u waka Sky World Aviation Services (SWAS) wa em ha ri Philippines wei da khut u ya oo wow pteiñ u yei puræ Pilot u ha SWAS wei da ong u wa emkaam u chim u da ka ram Educational Loan yow su ya ka bai puræ.
Kamtæ kiwa ha yung u Pynshaitbor da chim ram ki T. 18 Lak na ka Meghalaya Rural Bank, Rymbai Branch wei da su ya kani ka poisa cha ka Sky World Group Aviation Bank of Philippines.
Uwa ujor da lai u cha Philippines ha u Kmaichonglad (Dec) 2014 heiwa u Captain Sahi da yah pathan u oo cha Aero Equipt Aviation Inc. wei da pynbiej u Captain Sahi oo wow pyndep yei puræ u ha kani ka thaw.
Hadien kattu katni por da chem chitom u heiyatoh ka bai Tuition wei da hap sangeh u chiteiñ por yei lai puræ.
Kamtæ da lai yachem u wa ka tnat Civil Aviation Authority of Philippines (CAAP) wei da pyntip ki cha oo wa kini ki artylli ki skur wa e sikai wow man Pilot toh kiwa ym em yoh bor na ka sorkar wei ki bru yong ki kiwa kam toh ki Pilot toh kiwa ym em License Pilot.
Da pynitp ki leh waka SWAS leh kawa ym em tipmit ya ka da kiwi ki thaw esikai man Pilot kamjooh leh na ka sorkar.
Discussion about this post