Ha iwi i jia wa phylla iwa pynkhyrngiat leh ya kiwa boon, uwi u heh spah da chah thok u heipor wa dai u yei Ksiar iwa 2.1 kg cha ki bru wym tipmit heiwa kini ki bru da su ki ya oo da ki kot Rs. 500 kiwa em i dur u Actor ka Bollywood, u Anupam Kher heithaw yong u Mahatma Gandhi.
Uni u heh spah da tip ya oo kam u Mehul Thakkar.
U Thakkar da ujor u yeini ha Navrangpura Police Station, Ahmedabad heiwa da khana u kammon chah pynbiej u wow pdiang 26 song ki poisa da ki kot Rs. 500.
Ha kini ki poisa da thoh leh ya i pyrtuid “Resole Bank of India,” heithaw Reserve Bank of India heiwa da dai u yeini i Ksiar wa 2.1 kg ha ka 24 tarik uni u bnai.
Chooh chooh ha ki kot wa song ya ki poisa da chon ya ka chaap ka SBI deiwa thoh leh i kyntien Start Bank of India.
Da ong wa u Thakkar da yoh Phone u na u Prashant Patel, u Manager iwi i dukan dai ksiar heiwa u Patel da kwah u wow thied 2.1 kg i ksiar wei hadien wa yaklam pynbait, da rai wow dai yeini i ksiar hei dor Rs. 1.60 klur.
Ha ka 24 tarik u Thakkar da phah u ya uwa kreh u wow yachem wa ki bru u Patel heiwa da em leh le ngut ki bru wa yang wei hadien wa chimkti yei ksiar da su ya ka song poisa da ki kot Rs 500.
Hadien ini kini ki le ngut da e ki ya ka kor wow ñiaw ya ka poisa wei ki ar ngut won da mih ki deilang wa i ksiar wow lai thooh sa Rs. 30 lak na iwi i thaw katwa uwi uwa emlang da yang u heitæ.
Manda chem ki wa toh ka poisa thok da khana ki ya u Phakkar wei hawa takit ya u bru samen wa em heitæ da ong u wa da phah ya oo wow wanrah ya ka kor ñiaw poisa donhi.
Neiliang u Anupam Kher da khyrngiat u wow yoo yei dur yong oo deiwa ong leh wa ye u jia iwon iwon ha iwon iwon i por.
Discussion about this post