Shillong: Hadien i kyntait yong u Syiem ka Hima Nongspung wa ym em e NOC cha ka Assam wow chna ya ka surok ha New Balakhawa, Ri-Bhoi district, ynne ka sngi neiliang u Sordar ka Raij Warmawsaw-Umsohbar kawa haap ha ka Hima Nongspung, u Manasan Doloi da pynbaad u wa da em ka e NOC wa e da u Syiem, u Patrick Syiemiong wa u Secretary, u Michael Warjri cha ka Assam wow chna ya ka sarok PMGSY ha Balakhawa.
Katkam wa pyntip u Sordar ka Raij Warmawsaw-Umsohbar, u Doloi da ong u wa waroh chi kattu ka tai ka thaaiñ kawa haap ha i pait yong oo, ka chnong chong suk chong saiñ ko tangwa nadooh wa wan ka sarok da sdang mih ki kynrum kynram.
“Ya kani ka sarok ym toh ka Assam wa wan knieh pood tangwa da e hi ki bru yong i wei wa u Michael hi wa ya soi e NOC wa u MLA ka Assam,” da pynrap chooh chooh u Sordar.
U Doloi da ong u wa u Syiem da e NOC u cha ka Assam nadooh u snem 2011 katwa ha u snem 2016 da e won da u Secretary.
Da pynbaad u leh wa u Michael Warjri toh uwa synchaar embor kam u Secretary deiwa dai yaka thaw ka bhaw ki bru wei da khrong poisa u pyrchah yaka aiñ wei ye u man na kani ka daw da pynchrai ko ya kiwa boon wa pynman yei chah thombor u.
“I pynrem joor i ya kani ka chah thombor u Michael, tangwa sñiaw i wow ong wa i jia ha Balakhawa toh wa leh hi u Michael deiwa pynekaam bakla u ya i bor kam u Secretary,” da ong u.
Chooh chooh da ong wa i thaw sah u Michael toh kawa em du soo yung katwa oo da kam u wa em ki hadooh 36 tylli ki manyung wa em Job Card iwa da pynyoo che wa da pynemkaam bakla u yaka poisa paidbah.
Nalor kini ki pynbaad da kyntu ya ka sorkar wa emkaam wow thooh bniah hajrong wa yatoh wa u Michael khamtam waka skur Nongspung Secondary School kawa em hajan thaw sah yong oo kawa da pynman u kam ka thaw sah kiwa wan ke, wei kamjooh ya ka Ambulance wa e u MP ka Shillong kawa da pynemkaam u kam ka kari yong oo.
Discussion about this post