Katkam wa pyntip ki pulit, uwi uwa yah ya ka Truck wa em ya u number UP-38(T)3757 uwa tip kam u Md Kadir da ujor u wa hawa liwan u na Mizoram, da pynsangeh u yaka Truck ha sarok Shillong Bypass, Mawryngkneng, EKH yow chet ja harood sarok wei da wan ki damok wow tooh ka.
Heipor wa dang chet ja da wan ki 3 ngut ki bru kiwa ym tipmit kiwa da brait dawai iwa kynja um hei khmat yong wa uwa yarap u heiwa da yapler ki. Haka sngi wa bood heipor 1 waje i sngi da khyrngiat u hapoh ka kari u lok u kawa lai cha Kolkata uwa da khana wa da chem u ya oo wa thiah wiar yongbru u harood sarok wei da kit u oo hapoh ka kari yong oo. Kamtæ da sñiawthooh u wa da chah tooh ka kari u.
Ha iwi won iwa jia haka 20 tarik uni u bnai, U Coy Commander G-Coy, 30 BN., BSF da ujor u wa heipor 3 waje i step, ki chipai ka BSF da yoh kem ki ya kawi ka Truck (AS-01-DD-3647) wa yah da u Weldingson Kharbihkhiew (36 snem) kawa wan na Amlarem yow lai cha Dawki heiwa da em leh 5 ngut kiwi ki nong India kitæ u Ramjan Ali (32 snem), u Aynal Hoque (24 snem), u Shiningstar Lawai (22 snem), u Rebbentikular Bareh (19 snem) wa u Firstar Lamin (20 snem). Hawa pait yeiwa em hapoh ka Truck da chem ya 26 tylli ki masi kiwa da suba toh kiwa thmu wow chalan tooh cha Bangladesh.
Haka 21 tarik uni u bnai won, u Eleazer Diengdoh, President wa u Riskhem Lyngdoh, Secretary, KSU Pynursla da ujor ki wa heipor 8:45 i miet da chem ya soo ngut kiwa suba toh ki nong Bangladesh kiwa tip pyrtuid kam u Wahidul Islam, u Sahidul Islam kiwa waroh ar na Geruamukh, Nagaon, Assam, u Md Alom uwa na Badesor, Sylhet Bangladesh wa u Md Manzur Alam uwa na Changpoknagar, Sylhet, Bangladesh kiwa chem napoh ka kari AS-02-BC-8266 kiwa lai luti khlem biang ki kot ki sla.
