Chah tympdung sa kawi ka karkhana Coke ha East Jaiñtia Hills

U Deputy Commissioner ka East Jaiñtia Hills District da pyntip u wa hapoh i pait u J. Shylla, Additional Deputy Commissioner ka District da tympdung sa ya u toskhana kawi ka karkhana Coke kawa da chna khlem yoh ya ka Consent to Establish (CTE) na ka Meghalaya State Pollution Control Board hei emlang ki sahep na ka yung krehkaam u Superintendent of Police, ka MSPCB waka District Commerce and Industries Centre.

Kani ka karkhana toh kawa da tip kam ka M/S Druk Fuels Ltd., wa em ha Nongjri, Sutnga Elaka, East Jaiñtia Hills District.

Ya ini da leh katkam ka Office Order No:EJHD/GENL.261/COKE/Pt.IV/2023/151 Dated 7^th July, 2023 wa ka Order No: EJHD/GENL.261/COKE/Pt.IV/2023/152 Dated 11^th July, 2023 wei ya kini ki hukum toh wa da e da u Deputy Commissioner heiwa kini ki karkhana ye ki u krehkaam da u mooyong wa da tih tooh wei daw pynchlur leh yei tih mooyong pyrchah ya ka aiñ.

Ya ini i tympdung ya kani ka karkhana da leh heipor 3:00 waje ynne i sngi deiwa bood ya ki kyndon waroh khnang wow lait nei mynsoo wei ini i tympdung ya ki karkhana wa da chna pyrchah aiñ daw pteiñ i ha kini ki tayaaw wow wan.