Ki bru paidbah wa rahlang wa ki dieñ da psiah ki cha ka Magneto Mall wa em ha Raipur, Chhattisgarh ha ka 24 tarik heiwa da tympra ki yei pynriam Christmas wei kani ka sngi wa jia man ko leh ka sngi wa em wa khut pynman ya ka Bandh deiwa kam wa em kiwa pynkylla niam pyrchah aiñ.
Ki Security Guard wa em ha kani ka thaw da yaleh ki wow pynsageh ya kini ki bru tangwa ym ye ki.
Ki pulit da ong ki wa da em kamwa 30-40 ngut ki bru wa tymmoh yei dur ki kiwa da wan cha kani ka thaw kiwa da yut hadien wa tympra ki yei pynriam Christmas heiwa da booh leh ya ka FIR pyrchah ya ki.
Kiwa kreh ha kani ka Mall da antaad ki wa em kamwa 80-90 ngut ki bru wa da wan psiah heiwa da ong wa ha ki 16 snem wa da em kani ka Mall kut wa em kiwa khut pynman Bandh da ya krehlang bait wa ki wei ym pu em jooh yoo wa jia kamni.
Kiwi da khana ki wa da em ki kynthai kiwa da yaam nei tieñ wei kini ki bru da ong ki wym em kwah ki wow yoo ya utæ u Santa wei ki bru wa wan pait phlim ha kani ka Mall leh da tieñ ki hawa yoo ki yeini.
I khut pynman ya ka Bandh da ka Sarva Hindu Samaj toh hadien wa mih i kynaad hapyrdi ki ar jaitbru neidaw wa pynbaad ki wa em i chah pynkylla niam heiwa da tlep ya uwi u bru wa da khlaad ha ka thaaiñ Baster ka Kanker District.
Hanla ym em waroh wa kyrchaan ya kani ka Bandh tangwa kiwa boon ki dukan toh kiwa khang ha ki thaw wa man sor tangwa ha ki thaw wa man palatsor ym em da krehkaam bha i.
Ha ka 18 tarik uni u bnai da em palat 20 ngut ki pulit wa da mynsoo hadien wa da mih ka mynsoo mynsnaam ha chnong Bade Teoda ka Kanker District heiwa da mih i pyrchah yei tlep ya uwi u bru.
Ini da sdang i ha ka 16 tarik hadien wa u Rajman Salam uwa man kam u Sarpanch (waheh chnong) ka chnong Bade Teoda da tlep u yei metyap u pa ha i thaw yong ki hi deiwa leh niam Christan.
Hadien wa poor ini, ki bru da lai ki wow leh pynsih ya kawi ka thaw duwai blai wei da thang ki leh yeiwa em hapoh.
Yei metyap da tih biang ki katkam ka aiñ wei da lai tlep won ha i thaw wa da booh wow tlep bru.
Discussion about this post