Ka chnong Mukoiram kawa haap hapoh ka Thadlaskein C&RD Block toh ka chnong kawa maad ya chiboon i eh la ha i chong suk chong saaiñ ne ha ki kaam pynroi.
Ka KSU Khanduli-Umshangiar Unit, ha ka 20 tarik uni u bnai da chem ko wa em kawi ka thaw sait that (Washing Platform) kawa da chah tympra ha kiwa suba toh ki kynhun Karbi wa ki pulit Assam wa yahkhmat da u Agustin Hanse uwa na ka chnong Tahpat, West Karbi Anglong.
Ka seiñ da pyntip ko wa hawa kylli na u Secretary VEC ka Mukoiram da ong u wa ya katai ka thaw da pynkreh hapoh ka MGNREGA Work Code: 2101009051/WC/8843 kawa toh i kreh neibynta u snem 2018-2019, wei da chah tympra ko ha ka 14-03-2019.
Ka seiñ da sñiawkhia ko hajrong i leh stiñ yong ka sorkar jylla ya katai ka chnong heiwa ki seiñ saiñhima da nood ki du wow yalap Election ha katai ka chnong tangwa wow e yada ym nood ki. Kamtæ ka KSU Khanduli-Umshangiar Unit da kyrpaad ko ya ka sorkar jylla wow chimkhia u yaklam wa ka sorkar Assam yow lait na iwon iwon i thut hawa yatoh wa i pynkreh ya ki Scheme waphær waphær ha katai ka chnong.
