I kynaad wa joor bha kawa da jia ha Bangladesh da wanrah i chiboon i chah tympra ki thaw ki bhaw heiwa ka Indian Cultural Centre kawa em ha Dhaka, Bangladesh da chah thang ko wei u motdur yong u Tirot Sing Syiem uwa da pynyieñ ha pchem kani ka thaw da chah tympra u phrai.
Ya uni u mot wa da pynlut da ka sorkar India, da wai wei pynyieñ ha katai ka Centre ha ka 16 tarik u Thohlakhmi (Feb) uni u snem, tangwa hapoh 6 bnai uni u mot da chah tympra noh u ha kani ka yakhih ha Bangladesh.
I booh ya u mot ha Dhaka man ko kam ka dak wow kynmoo warom ya uni u khlawait ka ri Khasi uwa man u Syiem ka Hima Nongkhlaw, uwa da chah kset ha Dhaka ha kitu ki por.
Ha ini wa jia ha Bangladesh, ki Hindu kiwa man kam ki khian paaid da chah thombor ki heiwa ki yung ki sem kamjooh ki dukan ki da chah lute ki.
Da em leh ki Temple Hindu kiwa da hap wow yada da ki bru niam Muslim iwa da jia ha Cumilla.
Kawi ka Temple ka ISKCON wa em ha Meherpur, Khulna Division ka Bangladesh leh da chah thang ko deilang wa kawi ka Kali Temple wei da antaad waroh da em 5 tylli ki Temple kiwa da chah tympra chah thang.
Discussion about this post