U Montri Rangbah ka jylla, u Conrad K Sangma ynne da lai pait u ya ka yung krehkaam ka NPP wa em ha Tura kawa da chah leh pynsih heiwa da chah tympra ka dwar, chah tympiah ki yit wa kiwi de wa em hapoh iwa da jia ynnin ka sngi.
U Conrad hawa e yei klam da ong u wa ynnin da jia wa chah tympra chah leh pynsih kiwa boon ki thaw hadooh wa da em kiwa chah thang ha kti ki kattu katni ki bru wei ini wa jia toh iwa sñiawsih.
Da ong u leh wym em daw wow lai wan tympra ya ka Office ka Party tangwa da jia neidaw wa ini waroh da em kiwa pynman ka kam ka kaam Politics.
“I ym em poi pyrkhat i wow jia kamni wei kitu kiwa leh yeini daw pynchitom ki katkam ka aiñ,” da ong u Conrad.
Heijooh i por da phah u ya ka khubor cha ki dkhot ka Party deiwa ong wa kitu kiwa thang ya ka Office ka Party mut ki wa deiwa leh kamni daw pynkut ya ka Party, toh u tip ki wa ka NPP em ko hei mynsien ki bru wei la kammon kammon leh ym ye ki wow pynkut ya ka NPP.
Da ong u leh wa daw pynchna biang ya kani ka Office ka Party wei u pynkhlan chooh chooh ya ka Party hei krehkaam ko.
Discussion about this post