Kat dang mih ki sngi i chah thombor ki khian paaid ha Bangladesh dang joor i heiwa ha kani ka kynti uwi u heh niam Hindu da chah rahbor u na yung wei da chah tynyap u ha Dinajpur, Bangladesh ha ka 17 tarik uni u bnai iwa da pynsñiawsih ya kiwa ngaitniam Hindu ha Dhaka.
Ya uni u bru da tip kam u Bhabesh Chandra Roy uwa 58 snem i rta wei man u leh kam u Vice-president ka Biral Unit ka Bangladesh Puja Udjapan Parishad.
Katkam wa ong ka kurim u, ka Shantana Roy, u Bhabesh em u ha yung heipor wa yoh phone u heipor 4:30 i janmiet wow pyntikna wa em u ha yung.
Hadien 30 minit da wan soo ngut ki bru ha ki ar thuk-thuk wei da rahbor ki ya u Bhabesh heiwa da kit ya oo cha chnong Narabari heiwa da pynmynsoo ki oo.
Hei janmiet da kit ki ya u Bhabesh wa da yaplær cha yung da ka kari wei da yah ya oo wutwut cha Biral Upazila Health Complex wei neitæ won cha Dinajpur Medical College Hospital heiwa ki Doctor da ong ki wa da yap u.
U Abdus Sabur, uwa man u Officer-in-charge ka Biral Police Station da pyntikna u yeiwa jia wei i takit dang lai i chaphrang.
Neiliang ka sorkar India da beiñ joor bha ko yei chah thombor ki khian paaid ha Bangladesh khamtam hadien wa jia ini i chah tynyap u Bhabesh.
Discussion about this post