Ka KSU Laban Circle ynne ka sngi da lai e dorkhat ko cha u Divisional Forest Officer (DFO) ka East Khasi Hills hajrong i sah pyrchah aiñ ki baar jylla ha Mahadev Khola.
Katkam i thooh bniah ka seiñ da chem wa ka Forest Department da e thaw ko ya ki bru niam Hindu wow chna ya ka Mandir ha Mahadev Khola ha u snem 1923 wei i thaw u man ko thij du wow leh niam wei ymtoh wow buhai chnong.
Tangwa hei lai jngieh ka seiñ da chem wa da em hadooh 30-40 tylli ki manyung yong kiwa na baar jylla wei boon tylli ki dukan ki baar jylla wa wan sah khlem ki kot ki sla. Wei iwa pyntieñ ya ka seiñ toh wa ya kani ka thaw, ki dorbar chnong ym ye ki wow kam neibhah em ko hapoh i pait ka chnat Forest wei ki bru na baar jylla yoh ki wow psiah u mih katwa ngait khlem iwon iwon i pynrkhiñ kyndon.
Chooh chooh ka seiñ da ong ko i jakhlia na ki yung ki sem da chem toh kiwa pyntooid bait cha ka wah wei yei tngit leh da noh khiar khlem da pyrkhat ya ka rym-aw.
Ka seiñ da ong ko leh wa kani ka thaw man ko kam kawi ka thaw rieh kiwa dih drugs wei da em boon sien iwa da jia wa chah tooh chah lute ha kani ka thaw.
Neiliang u DFO da paan por u na ka seiñ yow lait pait wei wow beh ya ki bru wa da sah pyrchah ya ka aiñ.
