Jowai: Ka seiñ North East Indigenous People Federation (NEIPF) ha ka chi tarik uni u bnai da ujor ko ha u Superintendent of Police ka East Jaiñtia Hills pyrchah ya u OC ka Khliehriat Police Station wa chah u wow kit mooyong ki truck iwa man pyrchah ya iwa khang ka NGT.
Ka seiñ da ong ko wa i tih mooyong pyrchah ya ka aiñ dang pteiñ bait i hapoh ka ri-loom Jaiñtia wei ki pulit ym em ye ki u leh yei kaam yong ki yow khang ya ini wei kam ha ki chnong Bther, Muklong, Wah Sabi, Umthe, Kwai, Sakhain, Moolait wa kiwi kiwi kiwa em hapoh ka Sutnga Elaka kiwa em kamwa 20 Km na Khliehriat ki pulit ym jooh wan sylli ki ya kini ki thaw wa joor i tih mooyong.
Ka seiñ da pyntip ko leh wa ki truck kit mooyong wa mih na kini ki thaw haap lai luti ki na Lad Sutnga heiwa ki pulit ym em leh ki yei kaam yong ki heiwa hei synyaaw ym duna ya 200 tylli ki truck kit mooyong wa chah u lai ki hapoh i pait u OC ka Khliehriat PS.
Ka seiñ da pynbaad ko wa ki pulit da chim ki T. 1500 kawi ka truck na ki tre paar yow chah u pynpoi ya u mooyong cha ka Depot katwa na Depot cha ki karkhana pynmih khyndawbilat da chim T. 4000 kawi ka truck.
Kamtæ ka seiñ da kyntu ko ya u SP wow pynchitom ya u OC ya kini ki kaam pyrchah aiñ wa leh u.
Discussion about this post