Shillong: Uwa yasaaid aiñ ka Supreme Court, u Daniel Stone L Nonglait da ujor u pyrchah ya uwi u bru uwa kam Khasi wei uwa khrong poisa ha sorbah Delhi, kawa da poor cha ki Social Media ha u snem wa dadep.
Kani ka ujor, u Daniel uwa man leh u Empanelled Lawyer na thaaiñ mihsngi, toh wa hajrong ka yurim wa uni u bru da kam u wa toh u Panbor Simon Kharkongor wa sah ha Cleve Colony Laitumkhrah, Shillong tangwa ym em won kiwa tipmit ya oo. Chooh chooh u Daniel da ong u wa uni u bru toh uwa tip u klam Khasi hanlada oo ymtoh u Khasi wei tip u leh wow klam Garo, Mizo wa Naga.
Hawa yaklam wa kiwa pathai khubor ynne ka sngi, u Daniel da ong u wa hadien wa lai takit u na Meghalaya House ha Delhi, da pyntip wa uni u jooh u bru da kam u toh uwa na Mawryngkneng heipor wa wan u cha Meghalaya House ha Delhi ha u snem 2016, tangwa hawa takit na Mawryngkneng, ym em wa tipmit ya oo.
Hadien wa chem wa uni u bru khrong poisa u deiwa thok, da ujor noh u (Daniel) pyrchah ya oo ha Mawryngkneng Police Station wa ha Laitumkhrah Police Station.
Da pyntip u leh wa hadooh katni uni u bru dang rieh u deiwa kyntu ya ki pulit wow thooh ya oo neibhah wa da pynemkaam bakla u yei pyrtuid yong kiwi wa ki kur ki jait yong kiwi.
Discussion about this post