Jowai: Katkam ka ujor FIR wa da e da u Knightstar Amkhloo uwa sah ha Ladrymbai Dongwah wa u Wansymper Biam, Secretary Chnong ka Ladrymbai Dongwah da ujor ki pyrchah ya uwi u bru wa tip kam u Phillip Bamon uwa sah ha Ladrymbai Datsimpien wa ya ki lok yong oo.
Katkam ka FIR da ong wa ha ka 6 tarik uni u bnai u Phillip Bamon deilang wa ki lok kynthai yong oo ka Gracebidel Rymbai, ka Yowanka Suchiang wa ki lok chynrang u ki wym tipmit da wan ki da ka kari Maruti Gypsy rong soo wa em ya u number ML-04A-0991 heipor 9:00 waje i miet cha yung u Knightstar dei thmu wow lute ya ka yung u wei da maham tynyap ki leh ya kiwa hayung u.
Da rah ki leh da ki tiar pynmynsoo kam ka wait wa kiwi kiwi ki tiar wei da thooh ki leh ya u Knightstar u wym em ha yung ha itai i por, wei em du ki kynthai.
Da ong leh wa u Phillip da jrong kti u ki ki kynthai wa em hapoh yung u Knightstar wei da thmu u leh wow thap ki hapoh kari yow kit yabor ya ki.
Kini ki kynthai won da kiad da kbai ki yow yoh yarap ki na ki jan yung kiwa da mih wow yarap ya ki. Kamtæ u Phillip da yut u na ini i thaw deiwa maham wei klam da ki ktien sih.
U Secretary Chnong da ong u wa ini i leh uni u Phillip da booh ko yei maa ya ka chnong wei kamtæ da kyntu ya ki pulit wow kem noh ya uni u bru.
Discussion about this post