Chah yooh u wi u bru na khlieh

Jowai : Ynne ka 7 tarik hei por kamwa chitein sngi ha Ynñiawmer u wi u bru da chah yooh u ha ka truck na khlieh hadooh wa yap u.

Katkam ka khubor wa yoh da ong wa uni u bru toh uwa ym tipmit uwa yah wei da muaid u. Da ku u ha kani ka truck na Phramer wei manda poi ha ka Weight Bridge wa em ha Ynñiawmer da phah hiar ya oo yow su poisa. Kani ka truck da sang ko u lai cha khmat hadien wa da dep kaam ko.

Uni u bru u wym tip pyrtuid hadooh katni da kdong u ka kani ka truck yow ku biang ha ka tangwa hap u wei da chah yooh u ha ka chaka dien kani ka truck na khlieh ka wa me ya u number ASOI-EC-3722.

Kani ka truck toh kawa 12 chaka kawa yah da u Sanjay Singh na ka chnong Alipore, Batanagar District West Bengal wei thmu ko u lai cha Guwahati kawa dang wan na Lumchnong.

Da kit ya uwa yap cha Civil Hospital, Ialong yow leh yeiwa emkaam. Neiliang ki police dang takit ki yow tip pyrtuid ya uni u bru.