U Lat ka jylla Meghalaya, u Satya Pal Malik da ong u wa i chong suk ha ka jylla ym em u chah ktah i, tangwa da em ki kattu katni ki jia ki wym biang kam cha kiwi ki jylla, heiwa da ong u wa ha jylla ym em iwon iwon i wow synjor bha i long i man.
Ka jylla ha ki kajiak tayaw wa dadep da mih i awri awra khamtam hadien ka 13 tarik u Naisaphra wa chah siat yap u heh warim ka HNLC, u Cherish Starfield Thangkhiew, heiwa da pynbor ya ka sorkar wow pynkrehkaam noh da ka Curfew wa i khang ya ka Internet chipor wei hajrong ini neiliang u Lat da kyntait u wa em i chah ktah ha i chongsuk ha ka jylla khamtam ha nongbah Shillong.
Heiyatoh wa i chah pakhot moo ki kari sonteri yong oo ha ka 17 tarik Naisaphra ha yingkieñ Mawlai, u Lat da phylla u deiwa ong leh wa boi ki bru kiwa leh ye ki wow jubab yei daw wei kam ini ymtoh de u jia i.
Hawa kylli won hajrong i chah siat u Thangkhiew, neiliang u Lat da ong u wa ini toh iwa ympoi pyrkhat wei ymtoh wow jia, wei katni dang yang sa ka takit wow tip yeiwa jia lada i leh ki pulit man sakhiat i palat deiwa thombor yei hok manbru.
Hajrong i dawa ‘Ka Sur ki Nong Mawlai’ wow beh kreh chipor ya ki pulit, u Lat da ong u wa ympu kwah u wow klam iwon iwon hajrong ini neibhha wa da takit yeiwa jia wei daw yang ya ka bui (Report) yow tip ka sorkar iyi wa toh u leh.
