Ynne ka sngi u President ka VPP uwa man leh u MLA ka Nongkrem, u Ardent Basaiawmoit, ha Iawmuisang, Jowai ha ka yalang pynsñiawthooh hajrong ka Reservation Policy wa ka Roster System da ong u wa ka jaitbru toh u man ko kawa yatylli heiwa da batai u leh ya i daw wa sdang ya kani ka Party.
Da ong u wa katkam wa man katni, kani ka Reservation Policy man ko kawa khia chiliang kamtæ da dawa na ka sorkar wow yaklam hajrong ini heiwa ynnin u Montri Rangbah da pynbna u wow yaklam hajrong ini i kaam.
Da ong u wa da dawa na ka sorkar wow sylli namo wow Review biang ya ka Reservation Policy wei da dawa wow pynsangeh chwa ya i thung kreh katkam ka Roster System.
Chooh chooh da kylli u cheiwon wiar kiwa mihkhmat na Ri-loom Jaiñtia wow dawa wow klam ya i hok ka jaitbru.
Da ong u wa da thung ya ki Chairman wa ki Adviser tangwa i thaw noh jep ha Jowai ym yoh ka sorkar.
U Ardent da ong u leh wa ka Party ym chah ko wow thung kreh biang kattu wei lada nujor yei boon paaid ym yahaap de wei rukom bhah kreh katni katkam i boon ki bru ha kawi ka jaitbru.
Heijooh i por da ong u wa da thoh u cha ka sorkar heiyatoh wa ini tangwa suki bait ko wei katni da chynna yei klam u Montri Rangbah wa daw chah u yaklam hajrong ini.
Da ong u leh wa ki MLA na Khasi Jaiñtia kiwa em ha ka sorkar weileh ym nood ki u klam hajrong ka Roster System.
Chooh chooh da ong u wa ka VPP toh ka seiñ kawa kreh neibynta ka jaitbru.
Heiyatoh wa i lai cha ka Kasari, da ong u wa ka Kasari ymtoh kawa chna aiñ tangwa ka Yung Dorbar kawa toh u chna aiñ heiwa da ong u wa emkaam wow thung da ka Committee hajrong ini.
Da ong u leh wa katni da em boon kiwa kwah u yakhun na ka VPP.
Khaddooh da ong u wa daw pait ya i rai ka Committee wei ymtoh u chah wow thung kreh kat wympu dep rai ka Committee wei ymtoh wow chong slem kani ka Committee.
Da kyntu u leh ya ki paidbah wow kyrchaan wei wow kreh chirup neibynta ini i kaam.
