Chem biang yei em mooyong palat yeiwa dadep chim yukheiñ ha East Jaiñtia Hills

Ka mukotduma heiyatoh wa i tih mooyong pyrchah aiñ hapoh ka jylla da chong bichaar biang ka ynnin ka sngi da ka Meghalaya High Court heiwa da wanrah leh ya ka 27^th Interim Report wei neiliang u muktiar ka sorkar jylla da kdaw u ya iyi wa da leh katkam wa phah da ka yung bichaar nadooh wow dai lilam ya u mooyong wa dang sah, i su ya ka bai kit, i wym kit ya u mooyong wa dadep dai wei kamjooh i pynkylla ya ka kyndon ka Auction Policy 2022 katkam wa da phah.

Ha kani ka Report da kdaw yei em 1,92,840.13 Tonnes u mooyong cha baar ka thaw booh mooyong wa da booh da ka CIL iwa mut wa uni u mooyong toh uwa da tih pyrchah ya ka aiñ. Ka yung bichaar da kdaw ko leh yei wym sdang de ka sorkar yei chna ya ki Smart Integrated Check Post deiwa e daw wym yoh thaw u booh ki wei ym em leh lai tlep ya ki krem mooyong.

Kani ka Report da klam ko leh chaphang ka Coal Audit Committee kawa da toh wow pynsakhiat ya ki kot ki sla ka DMR yei pynemkaam ya u mooyong ha ki karkhana wei yow tip leh neiwon mih uni u mooyong neibhah kani leh man ko kawa emkaam yow khanglaad yei tih mooyong pyrchah ya ka aiñ.

Ka sorkar da jubab ko deiwa ong wa da leh chiboon wei hanla dang em i tih mooyong pyrchah aiñ, da yieñ skem wow pyndooh jait yeini.

Related posts

Pynsah naam ka Seiñraij Jowai deiwa wai ya u motdur u Kambel Shullai uwa chem ya ka Khnap Thangbru

June 16, 2025

U chna pynmiat ya ka Kiang Nangbah Stadium katkam wa chah i thaw: Sniawbhalang

June 16, 2025

Da chong bichaar leh ya ka 28^th Interim Report kawa da daw ya le tylli ki phang kawi toh yei em u mooyong wym pu em chim yukheiñ wa em cha baar ka Depot wa da booh ka CIL uwa dapoi 1,92,840 Tonnes heiwa 1,80,299.48 Tonnes toh uwa da chem du ha East Jaiñtia Hills donhi. Wei heiyatoh wa ini, neiliang u muktiar ka sorkar da paan por u yow e jubab heiwa kammon da jia ini.

Ka phang wa ar toh yei wym leh ka Meghalaya Basin Development Agency (MBDA) yei puræ bniah ya ki Aerial Map yow tip katwon u mooyong wa em ha ki chnong ka South West Khasi Hills wei lada emkaam ye ko wow paan yarap na ka North East Space Application.

Ka phang wa le toh yei e ya ki Mining Transport Challans wa e da ka DMR heiwa da chem ar sien wa da tyngkheiñ ya ka Clause 10 (c) ka Revised Comprehensive Plan, 2022 heiwa ym em khana yei pyrtuid wei thaw sah u tre ka kari wei ym em leh khana yei Mobile Number uwa yah kamjooh u tre kari.

Kamtæ da phah ya ka sorkar jylla wow e jubab ko deiwa bniah yeini wa chem wa em u mooyong ha East Jaiñtia Hills palat yeiwa dadep chim yukheiñ.