U CEO ka Serum Institute of India (SII), u Adar Poonawalla ynnin ka sngi da ong u wa dang yaleh wow pynbait yei eh wa chem da ki nong India kiwa da chim yei tika yada COVID-19 iwa tip kam i Covishield (wa chna da ka SII) hawa lai luti ki hapoh ka ri Europe.
Ka European Union (EU) da sdang ko ya ka Vaccine Passport Programme kawa daw chah ya ki bru wow lai u wan ki deiwa laitlooid hapoh ka EU nadooh ka 1 tarik u Naiynñiaw lada dep ki wow yoh ya iwi na ki 4 tylli ki tika wa da tipmit wei da chna hapoh ki ri sepsngi. Hanla ini kynthup ko ya i tika ka AstraZeneca, ym em won kynthup ya i Covishield, iwa da pynmih hapoh India da ka SII.
Ha u Tweeter u Poonawalla da ong u wa daw yaklam ya ini wa ki bor EU wa ki bor ri yow pynbait ya ini. “Nga sñiawthooh O wa boon ki nong India da chim ki yei Covishield wei da chem chitom ki hawa lai luti ki hapoh ka EU. Nga kular O wow yaklam wa ki heh dooh yow pynbait ya ini i kaam nadooh ki bor wa pait ya i e tika kamjooh kiwa pynlai ri”.
Ka SII da dep ko wow pynmih 300 Million sien wow e yei tika COVID-19 hadooh uni u Naiynru heiwa hapoh ka ri India da dep wow e palat 32 klur sien ini i tika.
Ha EU da e bor da ka European Medicines Agency (EMA) kam i tika yada COVID-19 ya i Vaxzevria iwa chna da ka AstraZeneca ha Europe heiwa ka SII da ya krehlang ko wa ka AstraZeneca yow chna ya ini i jooh i tika wa da e pyrtuid Covishield ha India. Ha Europe najrong i Vaxzevria, da chah leh wow pynemkaam ya u Pfizer-BioNTech, Moderna wa i dawai tika ka Johnson & Johnson.
Neiliang ka EMA da ong ko wa ka SII ym em yaleh ko wow yoh License yow pynemkaam ya i Covishield hapoh ka Europe.
I tika ka Oxford-AstraZeneca kawa chna ya i Vaxzervia da pynmih ya ki da ki karkhana wa kynthup ya ka SII wa em ha Pune, India, ka S.K. Biosciences, South Korea, Catalalent Angani, Italy, CP Pharmaceuticals ha UK, IDT Biologika ha Germany wa ka Universal Farma ha Spain.
Neiliang ka WHO leh da mynjur wei da pynchlur ko yei pynemkaam ya i tika Covishield.
Ka SII, 50% na i tika wa pynmih ko toh iwa da booh wow pynemkaam du hapoh India wa cha kiwi ki ri kiwa duna hei yoh i kot kam chibynta ka COVAX Alliance wa khlieh da ka WHO yow pynyoh tika cha ki ri wa dooh wa dang sahdien.
Iwa leh won ka EU wow sdang da ka Green Pass toh du ya ki tika wa da mynjur da ka EMA ym toh da kiwa mynjur da ka WHO katwa ka ri Iceland won pdiang ko ya kiwon kiwon kiwa da yoh ya ki tika wa da mynjur da ka WHO.
