I sangeh kamai ki kari ha kini ki sngi da wanrah ko yei eh i khoo ya ki paidbah wa hap chaniah haki kari kamai neibynta u lai kreh, i lai cha ki skur ki College wa kiwi ki emkaam yong ki.
Ha Jowai nadooh wa sdang yakhih ka seiñ ki kari kamai hapoh ka lama yong ka Meghalaya Joint Action Committee of Commercial Vehicle, ym pu em yoo yei langam ki bru wa wan yaw khamtam haka sngi Musiang neibhah wa dang du ki kari Local Taxi wa ya ksohkti nadoh ka sngi nyngkong yong i yakhih katwa ki kari Tourist won dang kamai hi ki kamwa jooh.
Tangwa hanla ki bru naki chong waphær waphær da ye ki u poi Jowai, chem chitom won ki wow lai emkaam cha ki thaw waphær waphær ka chnong Jowai neidaw wym em Local Taxi, wei manda pyrchang pynsangeh kari kamai Tourist, ym em wa sangeh.
Kamtæ hawa khyruiñ won chei man i long ki sarok ynne ka sngi 9 tarik, iwa wot ki kari kamai Tourist leh da yakrehlang ki deiwa sangeh kamai ha waroh ka Ri-loom Jaiñtia wa kynthup ha East wa West Jaiñtia Hills District, da sakhi wa ki sarok, ki Stand da thylli ki lait noh ki kari Private ha waroh ar ki District ka Ri-loom Jaiñtia kam ha Khliehriat wa ha Jowai.
Ha Jowai da yohlaad u yaklam wa ki katu katni ki khynnah skur kiwa hap wow yabeh skur man-ka- sngi cha Jowai da ki kari kamai wei ynne ka sngi won kat wym em kari kamai Tourist, da hap ki u yieñ daki kynta ha yaw.
Hawa kylli yaki kammon poi Jowai ki i step hawa ym em kari kamai, khana ki wa ku ki da ki kari Private, ki Pickup, ki thor-thor wa kiwi.
Chooh chooh da kylli wa pyrkhat hi ki mo deiyi u liwan ki chwa u mih i step na chnong? Jubab ki wa neidaw wa angnood i mynsien u poi cha skur ym em de johkhe ki u pyrkhat neibynta i liwan.
Ha kani ka sngi em leh ki khynnah skur wada rai kut wow liwan dei kjat hadooh wa poi chnong lym yoh kari.
