Ka hukum yong ka yung bichaar Meghalaya High Court wa kamjooh leh ka kyndon 144 CrPC wow khang yei lai ki truck kit mar wa kit palat 10 Metric Ton na ka yingkieñ Dwarksuid wa 20MT naka yingkieñ ha Dam Umiam da wanrah i yei sahkut ki kari man ka sngi ha u sarokbah NH6 khamtam ha ki thaaiñ Chohchrieh wa Phramer.
Ini i sahkut ki truck da neh i dei yong sngi heiwa ynne da yoh u yaklam wa ki kattu katni ngut kiwa yah truck kiwa da ood neibhah wa da sah ki chi thaw don dei yong sngi.
Da em kiwa yah da ong ki wa da neh ki ha tymbud uni u sarok la e sngi kattu wei da em kiwa ong wa da wan ki na Kalain cha Guwahati da chimpor hadooh 3 sngi du i lai.
Uwi won uwa yah truck uwa kit dawai da ong u wa da wan u na Silchar da chimpor dei yong 3 sngi neidaw ka No Entry.
Da kam ki leh wa i mar wa kit ki da em i du hapoh 9 Ton donhi wei da phylla ki neiyi i daw wa ksoh ya ki.
Kiwa boon ki truck da tieñsar ki ya sih ki mar wa kit ki kam ki jhoor, ki ktung wa kiwi kiwi.
Da pynsñiaw ki leh yei mynsien wa khia neibhah wym yoh thaw ki wow baam.
“Ym awri i ya ka poisa tangwa emkaam i ya i thaw wow baam wow pyndap ya u kpoh yong i,” da ong uwi na kiwa yah truck.
Neiliang ki bor pulit ka East Jaiñtia Hills da pyntip ki wa da yaleh ki katwa ye wow pynlait ya ini i sahkut kari wei da kyntu ki leh ya ki paidbah wow man ki kiwa ngaitsneiñ yeiwa pynlai ki pulit.
