Ka Assembly Committee on Environment kawa da seiñ yow lai takit cha ka thaaiñ Domiasiat, Nongbah Jynrin wa cha Wahkaji heiyatoh wa mih khubor wa piah wei kaad ki top wa tlep ya ki jhep Uranium heiwa ya ini da lai wow leh haka 3 tarik uni u bnai, ynne ka sngi won da pynmih yeiwa chem namo ka Report na ini lai cha kini ki thaw.
Kani ka Committee toh kawa em leh 10 ngut ki MLA kiwa man kam ki dkhot heiwa u S.K. Sunn da man u kam u Chairman wei hawa lai pynman yei lai thooh bniah da emlang leh ki heh ka MPSCB, CPCB, AMD wa naka chnat i chait i khiah wa kiwi kiwi.
Haka Report ka Committee da ong wa nachwa da em i siam thlu (Exploratory Drilling) ha Nongbah-Jynrin wa ha thaaiñ Domiasiat yow thooh yei um u Uranium Oxide iwa da leh daka Atomic Mineral Division ka sorkar India wei hawa leh ya ini, da sai ya u moo (Sand Stone) wa emlang u Uranium Oxide uwa tip leh kam u Yellow Cake. Ya u Yellow Cake wa em ha uni u Sand Stone da pynkhlaad wei da booh jar jiar i thaw.
U Yellow Cake wa em ha u moo Sand Stone em u du kamwa 0.1% hadooh 0.2% ha man ka 1000 Kg u Sand Stone wa da sai na ki thlu wa yillu bha hanla duna bha i em u Uranium ha kini ki moo, kini ki moo won da em ki yei sap u Uranium wei da man Radioactive ki. Kamtæ lada ya kini ki moo wa da sai ym tymmoh wei kset yaki sbak, ka Radiation wa mih na ki toh kawa daw ktah bha yaka rymaw.
Ya ini i lai siam thlu iwa da sdang ha thaaiñ Domiasiat nadooh u Naisan, 1984 daka AMD da pyndep ha u snem 1993 wei da siam thlu waroh 365 tylli heiwa da chem wa em kamwa 9,500 Ton u Uranium ha kani ka thaaiñ.
Ya uni u moo Sand Stone da sai deiwa tih da ki 3 tylli ki Test Mine Pits yow ye u Test ya u Uranium wa em ha uni u Sand Stone. Ya iwa emkaam da rah noh na kini ki thaw wei ya kiwa sah da booh hapoh ki ar tylli ki tank wa chna da i khyndaw bilat.
Wei ha itu i por katkam wa chim yukheiñ ka AMD, ka Radiation Level ha kini ki tank toh 2.47 mSv/year wa ki thaw wa em chajan ka thaaiñ Nongbah Jynrin em ko 0.96 hadooh 1.92 mSv.
Neiliang ka Committee da phah ko yaki bru yow pynemkaam ya u Drone yow lai cha Domiasiat deilang wa ki bru ka AMD yow chim yukheiñ yei khlan bor ka Radiation haka 3 tarik uni u bnai wei da chem wa man i kamni ha wah heiwa katkam ki kyndon ka IAEA i Global Background Radiation Level wa ye u pdiang toh 2.4 mSV/yr tangwa cha ki thaw wa em ki bru toh u em 1mSV/yr nalor ka Background Level Radiation.
Hawa yaklam ka Committee wa ki kattu katni ki seiñ haka yalang wa pynman ha Wahkaji, da pynsñiiaw ki yei sñiawkhia wa em ka Uranium Radiation wei da sdang u piah u kaad ki tank wa tlep yei jhep Uranium.
U Syiem ka Hima Langrin da pyntip u ha kani ka yalang wa i piah i kaad kini ki top toh kiwa nadooh 4-5 snem nachwa tangwa kiwa boon ki bru ym tip ki ya ini na i daw wa em ki cha kdong cha chmiang.
Da chem leh wa ki chnong wa em chajan ka Domiasiat em ki ha ki loom wa em Uranium Oxide heiwa uni u Uranium da em u kamwa 0.088% ha u moo Sand Stone kamtæ ka Radiation kawa da em ha kini ki thaw toh kawa rap heh.
Na ki dur wa chon na u Drone da chem wa da em i pynchna ya iwa kaad wa piah kini ki tank wa tyllep yei jhep Uranium.
Kamtæ ka Committee da pynkut ko deiwa ong wa hanlada ym em de leh ya kiwon kiwon ki jait kaam wa yatoh wa u Uranium, emkaam hi wa na i por cha i por wa ki wow phah yaka MSPCB waka CPCB yow lai thaw yaka Radiation.
I khlan i bor Radiation wa da yoh wow thaw haka wah Jimiri toh iwa sñiawkhia ka Committee neibhah wa kani ka um da pynemkaam yaka kam ka um dih ya ki chnong wa em chajan Domiasiat, kamjooh wow booddien deiwa paitbniah hadooh katwon em Uranium ha ki um ki wah na i por cha i por.
Ka Committee da sñiaw ko leh wa neidaw wa em chwa ka Radiation cha kini ki thaw, emkaam leh wow leh yaka Health Survey yow tip yei long i man i chait i khiah ki bru.
Ki thaw wa em ki le tylli ki Uranium Test Mine Pits wa ki 2 tylli ki top wa tyllep yei jhep Uranium toh u pynman noh ki kam ki thaw wym hoi u lai u psiah ki bru lait na kitu kiwa da yoh bor.
Ka sorkar toh leh u booh ki yaka Police Outpost ha Wahkaji.
Ka Committee da sñiaw ko leh wa ka sorkar toh u khut ko da ki seiñ wa laitlooid kiwa chemphang ha kini ki kaam yow lai puræ bniah yaka Radiation wa em cha ki chnong wa em chajan ka Domiasiat kamjooh yaka um.
