Ka Environment Co-ordination Committee (ECC) ka Sutnga Elaka kawa da kreh yow dawa phah khang ya ki Coke Factory hapoh ka Elaka kiwa krehkaam pyrchah ya ka aiñ wei ki wym bood ya ki kyndon aiñ, da dep ko leh wow ujor pyrchah ya kini ki karkhana ha u DC ka East Jaiñtia Hills wei da booddien leh da ka RTI.
Ha ka RTI da chem wa em na kini ki Coke Factory wa mantre da ki Montri ka sorkar Meghalaya.
Ha ka 22 tarik uni u bnai, ki bru ka State Pollution Board da wan ki wow pait wow sylli ya kini ki karkhana heiwa da chem wa em da ki phaw tylli kiwa da dep chna wei kiwa da sdang wow thang mooyong.
Neiliang ka ECC da ong ko wa da yoo phylla wa hadien wa u DC da pynmih u ya ka hukum wow khang ya ki karkhana ki wym pu biang ya ki kot ki sla wei hadien wa lai booddien, u DC da pyntip u wa ym pu em yoh ya ka bui (Report) na ka Pollution Board.
Katkam ka aiñ Air & Water Act kiwon kiwon ki karkhana toh u yoh ki ya ka Consent to Establish (CTE) na ka State Pollution Board chwa wow pynkreh wei daw pynchitom ya kiwa pynkreh karkhana khlem ki CTE. Kamtæ ka ECC daw pait chwa ko lada ka Pollution Board bood ko ya ki kyndon aiñ wow pynchitom ya ki tre karkhana.
Ka ECC da khyrngiat ko leh wow chem lyngba ki RTI wa em ki tre chong kiwa yoh du 5% na ka nong (Profit & Loss) yong ki karkhana wei kawa tam toh da lah cha ki baar jylla. Da chem leh wa ki tre ri tre muluk kiwa dai leh ya ki NOC wa yoh ki na ka Elaka cha kiwi ki bru.
Da chem leh wa i pyrtuid wa mih kiwa paan bor na ka Single Window Agency ym toh ki jooh kiwa wan paan NOC na ka Elaka.
Ka ECC da beiñ joor ko ya u James Sangma uwa toh u pait ya ka chnat khloo chnat rymaw uwa da leh mylliñ ya kani ka kaam uwa ym ye wow leh yei kaam yong oo.
Ka ECC da sñiawdiaw ko hadooh kattæ kattæ ya ini i leh yong ka sorkar neibhah i boon yong kini ki karkhana da pyntikna ko wa ka mynried ki khon ki kti da poi ko cha wakut, neibhah nadooh ki por wa da lai ki thaaiñ yong ka Elaka da em ki hei kyrdooh um wa chyrkhei wei katni daw wan da ka kyrdooh la-ær wa yoomaa.
Ka ECC da ong ko leh wa kini ki tre karkhana toh ki bru kiwa em yung cha Shillong wa cha kiwi ki thaw wei ym salia de ki hadooh u pood wow chim ya ka la-ær riñ mynsien.
U Reading War, Legal Adviser ka ECC da ban joor wei kyrpaad joor u ya ki tre Coke wow sñiawbha em mynsien wyrai ya uwa dooh wa rangli.
Ka ECC da kdaw ko leh wa ha u snem wa da dep, da em 50 tylli ki Coke Factory kiwa da chah tympra ha Arunachal Pradesh wei kini ki jooh ki bru kiwa wan pynbiej ya ki tre thaw wow chna ya kini ki karkhana hadien wa da chah beh na Arunachal Pradesh.
