Ka FKJGP-East Jaiñtia Hills District ha ka 20 tarik uni u bnai da chem ko yei wym bna ki Truck Dumper kiwa wan na Assam kiwa kit moochuni na ka thaaiñ Narpuh cha thaaiñ Lower Assam-Badarpur kiwa khlem da kheiñ de yei man chngaaiñ yong kiwi kiwa lai luti kamjooh kiwa chong chnong.
Ka seiñ da chem ko wa waroh ki Truck Dumper yong ka Assam da kit palat pood ya u moochuni wei da yoh sabut ki leh wa da em wa kit hadooh 12 MT katwa ha ka NOC da thoh wa da su ya 1.650 MT wei ya uni u moo da kit khlem da tymmoh ya oo wei ini leh kini ki truck da wanrah wei da booh ko yei maa ya ki paidbah yong kani thaaiñ.
Ka seiñ da pyrchang ko leh wow yachem wa u Range Forest Officer, Umkiang Range yow yaklam hajrong ka chalan tangwa ym em u ha i thaw kreh heiwa ki wakreh ha kani ka thaw da pdiang ki kakhmat ki dkhot ka seiñ wa em ki Truck wa kit palat pood.
Neiliang yong ka seiñ FKJGP- East Jaiñtia Hills da maham eh ko wa nadooh neini chakhmat wa waroh ki kari Assam toh wow tymmoh ki ya ki mar yong ki kamwa leh kiwi ki kari wa kit moochuni cha thaaiñ Ri Bhoi waroh wei wow bood ya ki kyndon ka aiñ. Kamtæ neiliang yong ka seiñ daw lai sylli ko ha kini ki sngi wow wan wei lada chem, daw phah pynhap ya kiwa kit palat pood.
Kamtæ da kyrpaad ya ki bor pynlai District nadooh ki pulit, u Motor Vehicle Inspector (MVI) khnang wow leh ki ya iwa emkaam.
Ka kyrwoh na u President ka FKJGP-EJH u Merald Suting.
