Ynne ka sngi, ka seiñ Hynñiewtrep Integrated Territorial Organisation (HITO) East Jaintia Hills da lai pait ko ya ka Civil Hospital Khliehriat hapoh i yahkhmat yong u President, u Deibormi Rymbai wa u General Secretary, u Sokini Dkhar wei da chem ki ya iwa boon wa dang duna wa hap u pynbiang ha kani ka thaw e sumaar.
Hawa yaklam ka seiñ wa u District Health & Medical Officer (DM&HO) da ong wa dang boon bha i duna hapoh kani ka Hospital. Kam wow pynkynmoo wa ha ka 14-02-2022 da pynku kyrdan ya kani ka CHC cha ka Civil Hospital da u Montri Rangbah ka Meghalaya tangwa ka seiñ da chem ko ym yahaap wow khut ka kam ka Hospital neidaw wa boon bha ki duna.
I duna wa hap wow pynbiang toh ka kor X-ray, ka Ultra Sound, ka Laboratory, thaw booh snam, ka Emergency Room, Operation Theatre, ka um dih, Doctor Anesthesiologist, Oxygen Pipe Line wei katkam i pyrtuid wa ong 100 Bedded Civil Hospital tangwa da chem wa em du 50 tylli donhi ki palong thiah kamwa man kattæ.
Puræ leh: Khaddooh da wai noh ya ka Khliehriat 100 Bedded Civil Hospital
