Chem ka HYC wa lyngba ka Tangjait yoh u man Khasi da ki jaitbru wym toh Khasi

Ka Hynñiewtrep Youths’ Council (HYC) Sohiong Circle da thoh ko cha u CEM ka KHADC yow ujor pyrchah yei leh Tangjait da ki bru wa chim kabu iwa da chemdien deiwa leh RTI heiwa da ong wa i pynkylla Khasi ya kiwi ki jaitbru da booh ko hei maa wa khroo yaka jaitbru.

Haka ujor cha u CEM da kdaw yaki jait kur wa thymme kiwa da mih kam ka Kharliiu, Khardoh, Kharheli, Kharlongngap wa ka Kharwillborn.

Ka seiñ da kdaw ko wa katkam ka RIT da chem wa da em u bru wa tip kam u Sylvanus Sngi Lyngdoh uwa da leh yaka Tangjait heiwa yaka kur Kharliiu toh waroh ar ki jaitbru Adivasi kiwa ym toh ki Khasi, yaka kur Khardoh ka kynthai toh ka Sunes Soni Rajbongshi katwa u chynrang toh u Swen Sandro Rajbongshi katwa ka kur Kharheli u chynrang toh u Bhim Biswa katwa ka kynthai toh ka Sumitra Biswa kiwa waroh ar toh ki Nepali kiwa waroh kiwa e yaka niam Catholic.

Yaka kur Kharlongngap toh kawa da leh Tangjait da u Naresh Ashen heiwa u chynrang toh u Khasi katwa ka kynthai toh ka Naga heiwa ka seiñ da ong ko wa u Naresh Ashen da che kdar nei pyrtuid wei kur u wa ym toh u jaitbru Khasi kammon da ye u wow leh yaka Tangjait.

Related posts

Yap uwi wa yarap wow sai ya ki ar ngut wa haap chapoh ka thlu um wa yillu 40 phut ha Jowai

July 25, 2024

Da toh ieh mylliñ ya kawi ka muna skur hawa chong Taxi ha Jowai

July 23, 2024

Sa iwi wa sñiawphylla wa chem ka seiñ toh yei leh Tangjait da uwa thoh pyrtuid “Agent Pvt. Land Nongtnger Nongsumsur” heiwa ka seiñ da ong ko wa kopsar kat kiwa em leh ye ki wow leh ya ini hewi u Agent Pvt. Land da pynmih u yaka kur Kharwillborn heiwa u chynrang toh u yong Marwein katwa ka kynthai toh ka yong Chettri ka jaitbru Nepali katwa yaka niam da booh kam ka Agent Pvt. Land.

Hajrong kini, ka seiñ da kyntu ko yaka KHADC kawa man kawa pynneh pynsah yaka Ritit Dustur wym toh u e laad yaki bru wa chim kabu neibhah lada yoh wow leh roi yaka Tangjait kat da uwa em, daw ktah bha ko neibhah haki Balang Christan ym em khang ya uwon uwon u bru wow man kam ki Pastor ne ki Phadar, kamtæ lada e bor haki Balang wow leh ki kamni, daw man wa da uwa ym toh u Khasi daw ye u wow leh yaka Tangjait.

Kamtæ ka seiñ da kyntu ko wow pyndooh pyndam noh ya kini ki kur kiwa dep pynmih wei yow pynbait noh yaka aiñ Khasi Hills Autonomous District (Khasi SocialCustom of Lineage) Act 1997 yow lait ini wow jia biang.

Da dawa leh wow e bor du ha ki Niam Khasi wow leh yaka Tangjait.