Ka HYC War Jaiñtia Circle hapoh i yahkhmat u President, u Yoodahunki Shylla diewa synraan lang ki dkhot ka seiñ hadien wa da yoh chiboon i ood i naam na ki paidbah wa kiwa kreh ka Pdengshakap PHC, da lai hiar cha kani ka thaw sumaar wei da chem ya chiboon i duna.
Ka seiñ da yoh ko leh wow yaklam wa u Medical Officer In-Charge, u Dr. Shemphang Pohtam uwa da khana wa ka PHC heipor wa slap, waroh ki kamra namo ki Ward da chlai um neibhah wym biang de ka tnoom wei ym biang de leh ka kari Ambulance wow kit ya kiwa kjut wa chitom heipor wa jhan wa emkaam.
Chooh chooh da khana u wa thut palat ka Mobile Network iwa da pyntkoh palat yei krehkaam ka PHC wei heiyatoh waka MHIS Scheme wa kiwi de kiwa hap leh Online, da hap ki wow lai thooh Network khnang khnang cha ki thaw wa biang ka Internet du wow yoh u leh yei chon ya ki pariam kti ki bru.
Da khana u leh wym em krehkaam de ka 50 kWp SPV Power Plant kawa da yoh hapoh ka Solar Power Scheme ka MNRE ka sorkar India kawa da pynkrehkaam da ka MNREDA Shillong (2016-17) lyngba ka Aditi Solar Private Limited wei kani toh kawa da sih hadooh katni.
Ka seiñ da ong ko wa hawa pait yei pchem wa ki soodong sookun kani ka PHC toh iwa da yoo chitom hadooh kattæ katttæ niebhah tang ki Dustbin wow noh jhep leh ym em wei ki thaw lai paikhana leh ki wym bing de.
Neiliang ka seiñ da kyntu ko ya u Doctor wow pyntikna wa wan kreh kiwa kreh hei por khnang wym chah ktah ki paidbah yong ka thaaiñ War East wei yow lait leh u mih iwon iwon i ood na ki paidbah.
Kamtæ ka seiñ da kyntu ko ya ka sorkar lyngba ka chnat i chait i khiah wow chimkhia smat yei duna kani ka PHC wei ka seiñ leh daw booddien ko ya kini ki phang wa emkaam yong kani ka thaw sumaar.
Discussion about this post