Jowai: Ka Jaiñtia Hills Autonomous District Council (JHADC) ynne ka sngi da hiar ko cha Mihmyntdu wow kynreh ya ki kot ki sla (License) yong ki dukan baar jylla kamjooh leh ki kot yong ki baar jylla kiwa kreh ha ka chnong Mihmyntdu, West Jaiñtia Hills wei ya ini da leh hapoh i yahkhmat u Executive Member wa pait ya ka chnat khayi pateiñ ka Council, u Winning G. Sungoh, ryngkat ki sahep ka chnat wa kynthup ya u B. Mulieh uwa man kam u Licensing Officer, u W. Lyngdoh wa man kam u Trade Inspector Taxation Department, u Waheh Chnong ka Mihmyntdu u A. Phawa, wa kiwa kreh Enforcement ka chnat.
Ha ini i lai kynreh kot ka Council da chem wa em hadooh kamwa 20 tylli ki dukan ki baar jylla kiwa ym biang ki kot kam ki Trading Licence wa 31 ngut won ki baar jylla kiwa khlem ki Service License kiwa toh u yoh na ka Council.
Hawa yaklam wa u Sungoh da ong u wa ini i leh ynne ka sngi man i iwa sdang pynkreh ya i rai ka yalang ka Council wa ki Waheh Chnong wow kynreh ya ki kot ki sla ki baar jylla wa wan seiñ kreh næ kiwa kreh khlem ki kot ki sla wa biang wei ini daw pteiñ i cha kiwi ki chnong leh kamjooh nadooh kiwa em hapoh ka East Jaiñtia Hills District chirup wa ki chnong khamtam ha ki thaw wa man yaw namo ki Commercial Area.
Da ong u leh wa lada chem ya kiwa khlem ki kot ki sla wa biang daw pynchitom ya ki katkam ki kyndon ka aiñ Jaiñtia Hills Autonomous District Trading by Non Tribal Rules 2016, wei wow daiñ kuna ya ki.
