Ka sorkar Meghalaya ini i wa dep da wanrah ko ya kawi ka Bill ha ka yung dorbar chna aiñ ka jylla yow yoh yei mynjur wow pynman aiñ kawa tip kam ka The Meghalaya Right to Public Services Act 2020 heiwa ka phang wa pyrdi yong ka toh wow pyntikna wa ki kaam yarap ka sorkar da pynpoi cha ki paidbah heipor wa biang wei wow pynchitom yaki bru sorkar ki heh sorkar kiwa ym ye wow leh ya ini.
Neiliang ka Thma U Rangli-Juki (TUR) da pyntip ko wa da yaleh ko wow wanrah yaka aiñ THE RIGHT OF CITIZENS FOR GRIEVANCE REDRESS AND SERVICE GUARANTEE IN MEGHALAYA kawa da dep ki wow thoh wei da e cha ka sorkar ha u snem 2013. Tangwa katni won da wanrah ka sorkar daka The Meghalaya Right to Public Services Act 2020 (MRPSA2020) kawa em boon i duna wa boonjait. Da ong leh wa ya kani ka aiñ kawa da thmu wow wanrah yei khooid i suba wa i kitkhlieh ki bru sorkar da wanrah hapoh ka Meghalaya Legislative Assembly khlem da yaklam yatai chwa iwa da pynman ya kani ka Draft Bill kawa em boon iwa lait iwa daw pyndooh mynsien yaki bru paidbah manda lai ujor ki.
Kamtæ da ong wa hapoh ka MRPSA 2020 da klam ya i emyatoh ki paidbah waki bru sorkar deiwa kheiñ da i por donhi ym em klam chaphang wow e yei chakri wa paka nalor wa leh yei kaam heipor wa biang. Ini da pynman ko ya kani ka aiñ wow ye hi-eh ki bru sorkar wow leh ki katwa sñiaw ka-it ki wei ym em leh booh ya waroh ki sahep sorkar wow em ki hapoh kani ka aiñ wei ini toh iwa maa bha deiwa ym em klam ko leh kam yaka Mining Department, PWD heiyatoh wow su yaki Bill ki Contractor kamjooh yaka Planning Department lane ka Tourism Department kiwa pait yaki kaam uiñke suwari kiwa em cha thaaiñ palatsor wei kani ka aiñ da thoh chynnam deiwa suki hi-eh chaphang kini ki phang.
Ka MRPSA 2020 leh ym em klam ko ya ki jaitkaam wa ki heh sorkar hap ki wow booh lane pyntip paidbah wei lada toh sakhiat wa kani ka aiñ toh neibynta ki paidbah toh u pyntip paidbah nadooh ki bru wa pynbiang yaki tiar ki tar (Supplier) wa kiwi de wa ki paidbah emhok ki wow tip kamjooh ki pyrtuid ki bru kiwa toh wow e yei chakri cha ki paidbah.
Chooh chooh da ong wa kuna wa pyndeiñ yaki bru sorkar kiwa ym leh yei kaam yong ki toh du T. 5000 donhi wei lada leh ma leh bakla daw pyndeiñ kuna T. 20,000 deiwa ong wa ini toh iwa duna bha hawa i baam tooh toh iwa boon phaw chah ya ini, kamtæ ym pyntieñ ko ya kiwa baam tooh.
Da ong leh wa kani ka kuna toh kawa daw e da ka State Public Service Delivery Commission kawa daw em da ki bru wa thung da u Chief Minister wa u Minister sorkar, ini ym pynman ko ya kani ka Commission kawa laitlooid. Ym em leh kdaw wa kammon wow pyndam yaki dkhot ka Commission ha kani ka aiñ kawa da thmu wow pyndooh yei baam tooh.
Kamtæ ka TUR da sñiaw ko wa waroh ki heh sorkar toh u em ki hapoh kani ka aiñ, ym du wow booh yei por wow bichaar yeiwa ujor ki paidbah kamjooh deiwa e yaka chakri wa khooid wa paka.
Ya ka State Public Service Delivery Commission toh u thung deiwa khooid wa suba wei ya kiwa jied khaddooh toh u emlang deiwa mynjur uwa yahkhmat ka liang pyrchah, u Chief Justice ka High Court lane u Accountant General ka jylla.
Yaka State Public Service Delivery Commission ym toh u ksohbor daka sorkar jylla wei toh u e bor leh cha ki District.
Ya ka kuna wa chah pyndeiñ ki heh sorkar toh u booh lang ki hapoh ka Service Book.
Ka State/District Public Service Delivery Commission toh u ye ki wow tyrwa ya i jait pynchitom pyrchah ya uwon uwon u bru sorkar.
Ki bru paidbah kiwa dooh yei hok yong ki neidaw wa leh ki bru sorkar hap ki wow yoh yaka bai lutsan.
Ya waroh iwa ong ka TUR ye phi wow yoh heini.
