Ynnin ka 19 tarik ka seiñ KSU Jowai Unit hapoh i yahkhmat ka Organising Committee, ryngkat i emlang u President u Ewanmi Phawa wa u General Secretary u Leonard Dhar da lai pait ki ya i rukom tkoh krehkaam ka yung krehkaam wow e sikai ha kiwa boonjait ki kaam kawa tip kam ka District Commerce & Industries Centre kawa em ha Mihmyntdu.
Hawa yaklam wa ka Functional Manager (FM) yong kani ka thaw da pyntip ko wa em chiboon ki e sikai nadooh i soor (Tailoring), thaiñ (Knitting), mistri (Carpentry) wa ki Scheme wa boonjait ya ki paidbah wei khamtam ya ki khynroo khyllood.
Ka seiñ da chem won ko wa em du ar tylli ki e sikai kiwa kynthup ya i soor wa i thaiñ.
Kamtæ ka seiñ da dawa ki wow booddien da kani ka thaw khnang wow sdang biang ya kiwi ki e sikai ha kani ka thaw.
Ka seiñ da ong ko leh wa i em ki e sikai wa boonjait ha kani ka thaw daw yarap bha ko ya ki khynroo khyllood wow seiñ kreh ki.
