Ka seiñ KSU Namdong Area Unit hadien wa da yoh ujor na ki paidbah kiwa lai chim dawai wa kiwa lai emkaam ha Namdong CHC hajrong i wym wan tista wan biangpor ki wakreh kani ka thaw sumaar.
Kamtæ ha ka 4 tarik uni u bnai da lai hiar ki cha kani ka CHC wei da chem wa hadooh 11:00 waje leh ym pu em wan ki wakreh nadooh ki Doctor wa ki Pharmacist wei ki kamra kreh leh dang man ki kiwa dang khang.
Najrong wa slem u wan kreh, smat won ki u liwan du heipor 2-3 waje i sngi.
Ka seiñ da chem ko leh wa ki Solar Panel ha kani ka CHC toh kiwa da sih kamtæ da dawa wow booh noh da ka Generator yow lait ki paidbah u chitom.
Kamtæ da ong wa ymye u pdiang ya ini i leh ki wakreh wei kammon u ye kani ka CHC wow e yei chakri ya kiwa boon tylli ki chnong wa pait ko wei lada ki bor wa pait ymye ki wow leh yeiwa emkaam, neiliang ka seiñ daw chim ko da ka luti kawa khor.
